བཀྲ་ཤིས་རྟགས་བརྒྱད་ཇི་ལྟར་བྱུང་ཚུལ།
གཙན་ཚྭ་དགེ་བཤེས་གཡུང་དྲུང་གཙུག་ཕུད།
འབྱུང་ཁུངས།གཡུང་དྲུང་བོན་གྱི་དྲ་ཚིགས། སྤེལ་མཁན།དྲ་ཚིགས་དོ་དམ་པས། སྤེལ་དུས།2017-10-20
      དེ་ཡང་རྟགས་བརྒྱད་ནི་བོད་མི་རིགས་ཀྱིས་ཁ་དགེ་བཀྲ་ཤིས་ཡོང་བའི་མཚོན་རྟགས་གཙིགས་ཆེ་ཤོས་ཤིག་འཛིན་གྱི་ཡོད་པ་ནི། ཆོས་ལུགས་ཀྱི་ལྟ་བ་ཡོད་མེད་ལ་མ་ལྟོས་པར་བོད་ཀྱི་སྲོལ་རྒྱུན་རིག་གནས་ལ་དགའ་ཞེན་ཡོད་རིགས་ཚང་མ་གཅིག་གྱུར་ཡིན། བཀྲ་ཤིས་པའི་རྟགས་བརྒྱད་འདི་ཆེ་ས་དགོན་གྱི་གཙུག་ལག་ཁང་དང་ལྷ་ཁང་ཆེ་ཆུང་རིགས་ཀུན་དང་བླ་བྲང་གྲྭ་ཤག་མགྲོན་ཁང་བཅས་དང་། རྒྱལ་པོའི་ཕོ་བྲང་། སྤྱིར་བཏང་གྲོང་པའི་སྡོད་ཁང་། ཁྲིམས་སྲིད་སྡེ་ཚན་གྱི་ཚོགས་ཁང་། སྤྲོ་སྐྱིད་ཁང་། གཞན་རས་གུར་བཅས་ཚང་མའི་ཕྱི་ནང་གང་སར་རི་མོའི་ལམ་དང་། རྒྱུ་ཆ་སྣ་ཚོགས་ཀྱིས་གྲུབ་པའི་དབྱིབས་གཟུགས་ལས་གྲུབ་པ་བཤམས་སྒྲིག་བྱེད་ཀྱིན་ཡོད། འདི་སྔོན་གཙོ་ངོས་སུ་འཆར་ངེས། དེ་ཡང་སེར་སྐྱ་ཀུན་གྱིས་བཀྲ་ཤིས་པའི་རྟགས་བརྒྱད་པོ་རེ་རེས་ཐུན་མོང་མ་ཡིན་པའི་མཚོན་དོན་རེ་ཡོད་པ་ཤེས་མིན་ལ་མ་ལྟོས་པར། སྤྱིར་རྟགས་བརྒྱད་དེ་ཡུལ་དུས་གནས་སྐབས་ཀུན་དང་། བྱ་བ་ཆེ་ཆུང་། སྤྱི་སྒེར། མི་ཆོས་དང་། ལྷ་ཆོས་གང་ཡིན་ཡང་ཁ་དགེ་བཀྲ་ཤིས་ཡོང་བའི་མཚོན་དོན་ཡིན་པ་ལ་ཐེ་ཚོམ་མེད་པ་ཕ་ཚ་བུ་རབས་ནས་བཞག་པའི་བག་ཆགས་བརྟན་པོའི་རྗེས་འགྲོ་བྱེད་ཀྱི་ཡོད་པ་སྨོས་མེད་རེད། དེ་ལྟར་བྱེད་དགོས་དོན་ནི། ཚད་ལྡན་གྱི་ལོ་རྒྱུན་དང་མ་འབྲེལ་བར་གནའ་བོའི་མི་རྣམས་ཀྱིས་རྒྱུ་མཚན་མེད་པར་རྨོངས་པའི་མོས་ཕྱོགས་ཙམ་གྱིས་མི་ཡི་འཚོ་བའི་ནང་རྒྱུན་ཆགས་སུ་གནས་པ་ཤིག་མ་ཡིན་པར། ཁུངས་ལྡན་ལོ་རྒྱུས་དང་འབྲེལ་བའི་བོད་ཀྱི་སྲོལ་རྒྱུན་རིག་གནས་ཀྱི་སྣ་བརྒྱའི་མེ་ཏོག་བཞད་པའི་སྐྱེད་ཚལ་དུ་མཛེས་སྡུག་རྣམ་པར་བཀྲ་བའི་མེ་ཏོག་ཨུཏྤལ་ཞིག་དང་གཉིས་སུ་མ་མཆིས།

      བོད་ཀྱི་ཐུན་མིན་ཆོས་དང་རིག་གནས་སྲོལ་རྒྱུན་བཟང་པོ་ཀུན་གྱི་མེས་པོ་ནི་བོན་སྟོན་གཤེན་རབ་མཆོག་ཡིན་པས་ད་ལན་རྟགས་བརྒྱད་འདི་ཡང་བཀྲ་ཤིས་པའི་མཚོན་རྟགས་སུ་ཇི་ལྟར་གྱུར་ཚུལ་ཡང་བོན་སྟོན་གཤེན་རབ་མཆོག་གི་མཛད་རྣམ་ལས་བཀྲ་ཤིས་པའི་ལྷ་མོ་བརྒྱད་ཀྱིས་སྟོན་པ་ལ་བཀྲ་ཤིས་གསོལ་བའི་རིམ་པ་ལྟར་དང་མཁན་ཆེན་ཉི་མ་རིན་པོ་ཆེས་མཛད་པའི་བྱམས་མའི་རྒྱན་མཆོད་ཨུཏྤལ་དཀར་པོའི་ཕྲེང་བའི་ནང་གི་རིམ་པ་ཡང་དེ་དང་མཐུན་པར་བཀོད་འདུག་པས་དེ་གཉིས་ལྟར་འགོད་པར་བྱ། དེ་ཡང་བཀྲ་ཤིས་པའི་རྟགས་བརྒྱད་འདི་དུས་རབས་ཀྱི་དབང་དུ་བྱས་ན་སྤྱི་ལོའི་སྔོན་གྱི་དུས་རབས་བོན་སྟོན་གཤེན་རབ་ཀྱི་སྐུ་དུས་ནས་དར་ཡོད། བོན་སྟོན་གཤེན་རབ་མཆོག་སྤྱི་ལོའི་སྔོན་དུས་རབས་གང་ཞིག་ལ་བྱོན་ཡོད་པ་དེང་དུས་ཚན་རིག་ཞིབ་འཇུག་པ་རྣམས་ཀྱིས་ཁས་ལེན་ལ་གཞིག་ནའང་མ་མཐའ་སྟོན་པ་བཅོམ་ལྡན་འདས་མ་འཁྲུངས་བའི་སྔོན་དུ་བྱོན་ཡོད་པ་ཡིན། བོན་གཞུང་རྣལ་མའི་དགོངས་དོན་ལྟར་ལོ་ངོ་ཁྲི་ཕྲག་སྔོན་ནས་བྱོན་ཡོད་པ་གསལ་པོ་གསུང་ཡོད། སྐབས་འདིར་མདོ་དྲི་མེད་དང་མཁན་ཆེན་ཉི་མས་མཛད་པའི་བྱམས་མའི་རྒྱན་མཆོད་ཨུཏྤལ་དཀར་པོའི་ཕྲེང་བ་ལྟར་འགོད་པར་བྱ།

      ༡༽ སྐྱོན་བྲལ་གྱི་པདྨ་ནི། བཀྲ་གསལ་པདྨའི་གདན་མཆོག་ལྷུན་ལ་རྫོགས། །གཤེན་རབ་དགུང་ལོ་ལྔའི་ཐོག་ནམ་མཁར་འཕུར་ནས་ལྷ་གནས་གཡུང་དྲུང་གསལ་བྱེད་གླིང་དུ་གཡུང་དྲུང་གསལ་སྨྲ་ཡོད་ཁམས་ཀྱི་རྒྱུད་གསུངས་ཏེ་ལྷ་ལ་བོན་འཁོར་སྐོར་སྐབས། ལྷ་མོ་པདྨ་མས་མེ་ཏོག་པདྨའི་མདངས་ཕུལ་ཏེ་གདན་ལ་པདྨ་ལྟ་བུའི་འཁོར་བའི་ཉེས་སྐྱོན་དང་བྲལ་བའི་བཀྲ་ཤིས་གསོལ། དེ་ནས་པདྨ་འདི་ཉིད་གདན་ལ་ཉེས་སྐྱོན་བྲལ་ཞིང་སྐུ་ཚེ་འཇིགས་བྲལ་ཞབས་པད་བསྐལ་བརྒྱར་བརྟན་པའི་མཚོན་རྟགས་ཞིག་ཏུ་གྱུར་བ་ཡིན།
      ༢༽ བཅུད་ལྡན་གྱི་བུམ་པ་ནི། རྒྱུན་མེད་ཕྱྭ་ཚེ་བདུད་རྩི་བུམ་པའི་མགུལ། །གཤེན་རབ་དགུང་ལོ་སོ་དྲུག་ཐོག་ལྷ་གནས་ནས་མར་བབས་ཏེ་རི་རབ་ཀྱི་རྩེ་མོར་བྱོན་ཏེ་ཕྱག་ས་ལ་བརྡབས་པས། ས་ཡི་དབུས་ནས་བཀྲ་ཤིས་ཀྱི་ལྷ་མོ་བུམ་པ་མས་གསེར་གྱི་བུམ་པ་བཅུད་ལྡན་ཞིག་ཕུལ་ཏེ་སྟོན་པའི་མགུལ་ལ་བུམ་པའི་བཀྲ་ཤིས་གསོལ་བས། སྟོན་པའི་སྐུ་ལུས་གསེར་མདངས་སུ་གྱུར་ཏེ་གཡུང་དྲུང་དག་པ་ལྷའི་རྒྱུད་བཤད། དེ་ནས་བུམ་པ་འདི་ཉིད་མགུལ་ལ་འདོད་དགུ་འབྱུང་བའི་བང་མཛོད་ལྟར་བཀྲ་ཤིས་པའི་མཚོན་རྟགས་ཤིག་ཏུ་གྱུར་བ་ཡིན།
      ༣༽ བཀྲ་ཤིས་པའི་གསེར་ཉ་ནི། འཇིགས་མེད་ཕྱག་ནི་བཀྲ་ཤིས་དོན་གྱི་ཉ། །གཤེན་རབ་དགུང་ལོ་སོ་བདུན་ཐོག་རི་བདུན་ཁ་རུ་བྱོན་ཏེ་གཡུང་དྲུང་ཁྱིམ་བདུན་མི་ཡི་ནང་དུ་གཡུང་དྲུང་རྨད་དུ་བྱུང་བའི་རྒྱུད་གསུངས། ཉ་ཅན་ལྷ་མོས་དེ་དུས་གསེར་ཉ་ཟུང་གཅིག་ཕུལ་ནས་ཕྱག་ལ་གསེར་ཉ་ལྟ་བུ་མཉེན་ཞིང་བདེ་བའི་བཀྲ་ཤིས་གསོལ་བས་གསེར་ཉ་འདི་ཉིད་ཕྱག་མཉེན་ཞིང་བདེ་བར་ཡོང་བའི་བཀྲ་ཤིས་གསོལ་བའི་མཚོན་རྟགས་ཞིག་ཏུ་ཆགས་པ་ཡིན།
      ༤༽ མི་ནུབ་པའི་རྒྱལ་མཚན་ནི། གསལ་བ་འོད་ལྡན་མི་ནུབ་རྒྱལ་མཚན་སྐུ། །གཤེན་གྱི་དགུང་ལོ་སོ་བརྒྱད་ཐོག་ཟད་མཚམས་མེ་ཏོག་གླིང་དུ་བདུད་རྗེ་ཁྱབ་པ་སོགས་རབ་ཏུ་བྱུང་སྟེ་གཡུང་དྲུང་ཕལ་ཆེན་འདུལ་བའི་རྒྱུད་བཤད་ཚེ། ལྷ་མོ་རྒྱལ་མཚན་མས་བདུད་ལས་རྣམ་པར་རྒྱལ་བའི་རྒྱལ་མཚན་བཙུགས་ཏེ། སྐུ་མི་མཐུན་ཕྱོགས་མཐའ་དག་གི་གཡུལ་ལས་རྒྱལ་བའི་བཀྲ་ཤིས་གསོལ་བས། དེ་ནས་རྒྱལ་མཚན་འདི་ཉིད་མི་མཐུན་ཕྱོགས་ལས་རྒྱལ་བའི་བཀྲ་ཤིས་པའི་མཚོན་རྟགས་ཞིག་ཏུ་ཆགས་པ་རེད།
      ༥༽ འགག་མེད་ཀྱི་དུང་ནི། སྒྲ་རྒྱལ་དུང་ཅན་མྱ་ངན་མེད་པའི་དབྱངས། །བོན་སྟོན་གཤེན་རབ་མཆོག་དགུང་ལོ་ཞེ་གཅིག་ཐོག་གསས་མཁར་ཁྲི་སྨོན་རྒྱལ་བཞད་ཀྱི་ནང་དུ་གཡུང་དྲུང་ཁྲི་སྨོན་རྒྱལ་བའི་རྒྱུད་བཤད་ནས་བོན་སྒྲས་འཇིག་རྟེན་ཁྱབ་པར་གྱུར་སྐབས། ལྷ་མོ་དུང་ཅན་མས་གསུང་ལ་འགག་པ་མེད་པར་བཀྲ་ཤིས་པའི་ཆེད་དུ་དུང་དཀར་གཡས་འཁྱིལ་ཞིག་ཕུལ་ཏེ་གསུང་ལ་འགག་མེད་ཚངས་དབྱངས་དྲུག་ཅུའི་བཀྲ་ཤིས་གསོལ་བ་ནས་བཟུང་དུང་དཀར་འདི་ཉིད་གསུང་ལ་འགག་པ་མེད་པའི་བཀྲ་ཤིས་པའི་མཚོན་རྟགས་ཞིག་ཏུ་གྱུར་པ་ཡིན།
      ༦༽ ཕུན་ཚོགས་ཀྱི་དཔལ་བེའུ་ནི། ཐུགས་ཉིད་དཔའ་བེའུ་མཚན་མའི་ཡུལ་ལས་འདས། །བོན་སྟོན་གཤེན་རབ་མཆོག་དགུང་ལོ་ཞེ་གཉིས་ཐོག་གསས་ཁང་ཁོལ་མ་ནེའུ་ཆུང་དུ་གཡུང་དྲུང་ཁོང་མ་དག་པའི་རྒྱུད་འཆད་སྐབས་ཐུགས་ཉིད་གཡོ་བ་མེད་པ་ཡེ་ཤེས་ལྔ་ཡི་རྣམ་པ་རབ་ཏུ་བཀྲ་བའི་ཚེ། ལྷ་མོ་དཔལ་བེའུ་མས་དཔལ་བེའུ་ཞིག་ཕུལ་ནས་ཐུགས་ལ་གཡོ་བ་མེད་པའི་བཀྲ་ཤིས་གསོལ་བས། དེ་ནས་བཟུང་དཔལ་བེའུ་འདི་ཉིད་ཐུགས་ལ་སྡུག་བསྔལ་དང་གཡོ་འཁྲུལ་མེད་པར་བཀྲ་ཤིས་པའི་མཚོན་རྟགས་ཞིག་ཏུ་གྱུར་པ་ཡིན།
      ༧༽ དབང་བསྒྱུར་གྱི་འཁོར་ལོ་ནི། དབང་བསྒྱུར་འཁོར་ལོ་ཐུགས་རྗེའི་རྩིབས་སྟོང་ལྡན། །བོན་སྟོན་གཤེན་རབ་མཆོག་དགུང་ལོ་ཞེ་གསུམ་ཐོག་ཕོ་གླིང་མོ་གླིང་གཉིས་ཀྱི་བར་མཚམས་མཆོད་རྟེན་ཆེན་པོའི་དྲུང་དུ་ལས་འབྲས་མངོན་སྟོན་སྲིད་པའི་འཁོར་ལོ་སོགས་མངོན་པའི་བོན་འཁོར་སྐོར་སྐབས། ལྷ་མོ་འཁོར་ལོ་མས་འཁོར་ལོ་ཞིག་ཕུལ་ནས་ཞབས་ལ་ཐོགས་ཆགས་མེད་པར་གསེར་གྱི་འཁོར་ལོས་བཀྲ་ཤིས་གསོལ་བས་དེ་ནས་བཟུང་འཁོར་ལོ་འདི་ཉིད་ཞབས་ལ་ཐོགས་ཆགས་མེད་པའི་བཀྲ་ཤིས་པའི་མཚོན་བྱེད་ཞིག་ཏུ་གྱུར་པ་ཡིན།
      ༨༽ སྐྱོབ་པའི་གདུགས་ནི། དབུ་ཆེན་གདུགས་ཆེན་ཞུ་ཤམ་པྲོག་དང་བཅས། །བོན་སྟོན་གཤེན་རབ་མཆོག་དགུང་ལོ་ཞེ་དགུའི་ཐོག་མི་གཡོ་བསམ་གཏན་གླིང་དུ་གཡེང་བའི་ཚོགས་སྤང་དབེན་པའི་གནས་བརྟེན་ཏེ། ཚིག་བོར་དོན་ལ་བསྒོམས་ཏེ་གཞི་ལམ་འབྲས་བུའི་བོན་རྣམས་གཏན་ལ་ཕབས་ནས་སྒོམ་པའི་ཐོག་བར། ལྷ་མོ་གདུགས་ཅན་མས་དབུ་ཡི་མཁའ་ལ་གདུགས་ཕུབ་ཏེ་དབུ་གདུགས་ལྟར་ཀུན་གྱི་བླ་ན་མཐོ་བའི་བཀྲ་ཤིས་གསོལ་བ་ནས་གདུགས་འདི་ཉིད་དབུ་འཕང་དགུང་དང་མཉམ་པར་བཀྲ་ཤིས་པའི་མཚོན་བྱེད་ཞིག་ཏུ་གྱུར་པ་ཡིན། དེ་ཡང་གོ་རིམ་སྒྲིག་ཚུལ་ལ་མི་མཐུན་འགའ་ཞིག་སྣང་བ་ནི། དཔེར་ན་བོན་དཔེ་རྒྱས་པ་ཀུན་སྣང་ལྟར་ན། དང་པོ་མི་ནུབ་པའི་རྒྱལ་མཚན། གཉིས་པ་སྐྱོབ་པའི་གདུགས་ཆེན། གསུམ་པ་བཅུད་ལྡན་བུམ་པ། བཞི་པ་ཕུན་ཚོགས་དཔལ་བེའུ། ལྔ་པ་བཀྲ་ཤིས་གསེར་ཉ། དྲུག་པ་སྒྲ་རྒྱལ་དུང་ཆེན། བདུན་པ་དབང་བསྒྱུར་འཁོར་ལོ། བརྒྱད་པ་སྐྱོན་བྲལ་པདྨ་ཞེས་མཚོན་བྱ་རྒྱལ་མཚན་དེ་སྐུ་ནུབ་པ་མེད་པ་མི་མཐུན་པའི་ཕྱོགས་ལས་རྒྱལ་བའི་བཀྲ་ཤིས་པའི་མཚོན་བྱེད་དང་། གདུགས་ནི་དབུ་ཉོན་མོངས་ཀྱི་ཚ་གདུང་སེལ་ཞིང་དུས་གསུམ་རྟག་ཏུ་སྲིད་ཞི་ཀུན་གྱི་བླ་རུ་མཐོ་བའི་བཀྲ་ཤིས་པའི་མཚོན་བྱེད་དང་། བུམ་པ་ནི་མགུལ་ལ་ཚངས་དབྱངས་དྲུག་ཅུའི་བཅུད་ལྡན་ཤིང་སྙན་པའི་སྒྲ་ཆེན་ཡོངས་ལ་ཁྱབ་པར་བཀྲ་ཤིས་པའི་མཚོན་བྱེད་དང་། དཔལ་བེའུ་ནི་ཐུགས་འཁྲུལ་བ་མེད་པ་སྤངས་རྟོགས་ཕུན་སུམ་ཚོགས་པར་བཀྲ་ཤིས་པའི་མཚོན་བྱེད་དང་། གསེར་ཉ་ནི་ཕྱག་རྫུ་འཕྲུལ་ཉམས་ང་མེད་ཅིང་མི་འཇིགས་སྟོབས་དང་ལྡན་པར་བཀྲ་ཤིས་པའི་མཚོན་བྱེད་དང་། དུང་ཆེན་ནི་གསུང་མ་འགག་ཀུན་གྲགས་ཐོགས་མེད་སྣང་སྲིད་ཟིལ་གྱིས་ནོན་པར་བཀྲ་ཤིས་པའི་མཚོན་བྱེད་དང་། འཁོར་ལོ་ནི་ཞབས་རྫུ་འཕྲུལ་ཐོགས་མེད་ཞིང་ཀུན་དབང་བསྒྱུར་བར་བཀྲ་ཤིས་པའི་མཚོན་བྱེད་དང་། པད་མ་ནི་གདན་དྲི་མེད་སྐྱོན་བྲལ་བཀྲ་ལ་གསལ་བར་བཀྲ་ཤིས་པའི་མཚོན་བྱེད་དུ་དབུ་ནས་མར་བཀྲ་ཤིས་གསོལ་བ་ལྟར་མཛད་འདུག དེ་ལྟར་བཀྲ་ཤིས་པའི་རྟགས་བརྒྱད་འདི་ཞང་བོད་རང་གི་ཐུན་མོང་མ་ཡིན་པའི་སྲོལ་རྒྱུན་གྱི་རིག་གནས་མི་རིགས་གཞན་ལ་ངོམ་རིན་ཆོག་པ་ཞིག་ཡིན་པ་ལས་ཁྱིམ་མཚེས་གཞན་ནས་གཡར་བ་ལྟ་བུ་མིན་པ་ཡིད་ཆེས་ཐུབ་པའོ། །ཡང་རྒྱ་ནག་སོགས་ཡུལ་གྲུ་གཞན་ལ་དར་ཡོད་པ་ནི་དཔེར་ན་རྒྱ་ནག་གིས་བཟོས་པའི་ཞལ་དཀར་སོགས་ལ་བཀྲ་ཤིས་པའི་རྟགས་བརྒྱད་ཀྱི་རི་མོ་རྒྱག་སྲོལ་ཡོད་པ་ལྟར་རོ། །སྲོལ་རྒྱུན་རིག་པའི་ལུགས་བཟང་འདི། །སྲོལ་རྒྱུན་བཟང་པོའི་མི་རིགས་ཀྱི། །སྲོལ་རྒྱུན་ཡ་རབས་མཚོན་བྱེད་དུ། །སྲོལ་རྒྱུན་ལམ་ནས་ངེས་ཤེས་ཐོབ། །གཙང་ཚྭ་དགེ་བཤེས་གཡུང་དྲུང་གཙུག་ཕུད་ཀྱིས་བྲིས་གནང་བར་ཅུང་ཟད་ཁ་སྣོན་དང་བཅས་ཁྱུངཿསྨོན་ལམ་པས། ཐ་ཚན་མུ་ཙུག་སྨར་རོ། །