ཁྱིམ་ཚང་སློབ་གསོ་ལས་ཕ་མའི་གོ་རྟོགས་གླེང་བ།
ནོར་བུ་འབུམ།
འབྱུང་ཁུངས། སྤེལ་མཁན། སྤེལ་དུས།2016-11-08

ཕ་མ་བཟང་བོར་བསམ་པའི་གོ་རྟོགས་མཐོ།

  རང་རེ་བོད་གངས་ཅན་གྱི་སྤྱི་ཚོགས་ཁྲོད། “ཕ་བཟང་གི་བུ་དང༌། གཡག་བཟང་གི་ཀོ་བ”ཟེར་བའི་གཏམ་དཔེ་ཞིག་དང༌། ཡང་ན“ཕ་རྒོད་པོ་ཤ་གཟན་ལ་བུ་ཁྭ་ཏ་སྐྱག་གཟན་འཁྲུངས”ཟེར་པའི་གཏམ་དཔེ་དག་རླུང་ལྟར་གྲགས་བཞིན་ཡོད། དེ་དག་མདོར་དྲིལ་ནས་བཤད་ན་ཁྱིམ་ཚང་གི་སློབ་གསོར་བཞག་པའི་སྡོམ་ཚིག་དང་། ཡང་ན་ཕ་མ་དག་གི་བསམ་པའི་གོ་རྟོགས་དང་སློབ་གསོའི་ཐབས་ལམ་ལ་བོར་བའི་ལེགས་བཤད་ཅིག་ཡིན་པ་རེད།
  རྒྱུ་མཚན་ནི་ཕ་མ་རྣམས་ཀྱིས་རང་གི་མི་རྒྱུད་ཕྱི་མར་སློབ་གསོ་བཟང་བོ་བཏང་ཞིང་བྱིས་པ་རྣམས་སྤྱོད་ཡོན་གཉིས་ལྡན་གྱི་མི་ཞིག་ཏུ་གྱུར་ཚེ། མི་རྣམས་ཀྱིས“ཕ་བཟང་གི་བུ་དང༌། གཡག་བཟང་གི་ཀོ་བ”ཟེར་ཞིང་གདེང་འཇོག་མཐོན་པོ་བྱེད་ལ། དེ་བཞིན་བྱིས་པར་སློབ་གསོ་ངན་པ་ཐེབས་ཏེ་མ་རབས་ཐ་ཤལ་གྱི་གཏམ་སྤྱོད་འདྲ་ཐོན་ཚེ། མི་རྣམས་ཀྱིས“ཕ་རྒོད་པོ་ཤ་གཟན་ལ་བུ་ཁྭ་ཏ་སྐྱག་གཟན་འཁྲུངས”ཟེར་ཞིང་འཕྱ་སྨོད་བྱེད། དོན་ལ་ཕ་མ་གོ་རྟོགས་ཅན་གྱིས་བྱིས་པ་འཇོན་ཐང་ཅན་སྐྱེད་སྲིང་བྱས་པ་དང་ཕ་མ་གོ་མེད་རྣམས་ཀྱིས་བྱིས་པ་ནུས་མེད་དག་སྐྱེད་སྲིང་བྱས་པ་ནི་སློབ་གསོའི་རྒྱུ་གང་དེར་ཡོན་ཏན་རབ་འབྲིང་ཐ་གསུམ་གྱི་འབྲས་བུ་སྨིན་པའི་ཆོས་ཉིད་ཙམ་ལས་མ་འདས་སོ། །
 ཡིན་ཡང་འཇིག་རྟེན་གྱི་ཕ་མ་སུ་དང་གང་ཡིན་ཡང༌། རང་གི་བྱིས་པའི་རྒྱུད་ལ་ཤུགས་རྐྱེན་ལེགས་པོ་བཞག་སྟེ་འཇོན་ཐང་ཅན་དུ་གཏོང་འདོད་པ་ལས། གོ་མེད་ནུས་མེད་དུ་གཏོང་སྙམ་མཁན་གཅིག་ཀྱང་ཡོད་མི་སྲིད་པ་ཡིན། འོན་ཀྱང་ཕ་མ་དག་གི་བསམ་པའི་གོ་རྟོགས་བཟང་ངན་གྱི་དབང་གིས་རང་གི་མི་རྒྱུད་ཕྱི་མ་སྟེ། བྱིས་པའི་ཀུན་སྤྱོད་དང་འབྱུང་སྤུས།  མི་གཞི་དང་མདུན་ལམ་བཅས་ལ་ཤུགས་རྐྱེན་རབ་འབྲིང་ཐ་གསུམ་བཞག་པར་བརྟེན། སྤྱི་ཚོགས་སྟེང་གི་མི་རྣམས་ཀྱི་སྤུས་ཚད་ལའང་ཁྱད་པར་དུ་མ་བྱུང་བ་གདོན་མི་ཟ་བ་རེད། དེ་བས་ཁྱིམ་ཚང་གི་སློབ་གསོ་གཏོང་མཁན་ཏེ། འཇིག་རྟེན་ཕ་མ་ཚོའི་བསམ་པའི་གོ་རྟོགས་ཇེ་མཐོར་གཏོང་རྒྱུ་ཡང་སྣང་མེད་དུ་འཇོག་མི་རིགས་པར་འདོད་ནས་རི་བོང་གནམ་རྡིབ་ཀྱི་སྡུག་བསྔལ་འདི་ཁུར་དུ་ཁྱེར་ནས་འབྲི་ཁུལ་བྱས་པ་ལགས།
  སྤྱིར་ཁྱིམ་ཚང་གི་སློབ་གསོ་ནི་བྱིས་པ་ནར་སོན་པའི་བརྒྱུད་རིམ་ཁྲོད་ཀྱི་སློབ་གསོ་ཁྱད་པར་ཅན་ཞིག་ཡིན་པས། སྤྱི་ཚོགས་དང་སློབ་གྲྭའི་སློབ་གསོ་སོགས་སློབ་གསོ་གང་གིས་ཀྱང་ཚབ་བྱེད་ཐབས་མེད་པ་ཡིན། ཐུན་མིན་གྱི་སློབ་གསོ་འདི་གཏོང་མཁན་ནི་ཁྱིམ་ཚང་སོ་སོའི་ཁྱིམ་བདག་སྟེ། བྱིས་པའི་ཕ་མ་རེ་རེ་ཡིན་ཕྱིན། ཁྱིམ་བདག་རྣམས་ལའང་སློབ་གསོ་རིག་པའི་གཞུང་ལུགས་དང་རྩ་བའི་ཤེས་བྱ། སློབ་གསོ་རིག་པའི་ཁ་ཕྱོགས་དང་ཐམས་ལམ། སློབ་གསོའི་ཆོས་ཉིད་དང་སེམས་ཁམས་རྟོག་འཇུག་གི་ཁྱད་ཆོས་སོགས་ཉུང་ཙམ་ལྡན་དགོས་པ་ནི་བཤད་མ་དགོས་པ་རེད། འོན་ཀྱང་རང་ནུས་ཀྱིས་རྒྱུས་ལོན་བྱས་པ་ལྟར་ན། བོད་ཞིང་འབྲོག་གི་ཁྱིམ་བདག་ཡོངས་ཀྱི 90% ལ་ཁྱིམ་ཚང་སློབ་གསོའི་འདུ་ཤེས་དང་གོ་རྟོགས་མེད་པར་བརྟེན། བྱིས་པའི་བྱ་བ་ཡོད་ཚད་དགེ་རྒན་དང་ཡང་ན་སློབ་གྲྭའི་སློབ་གསོ་ལ་སྐྱབས་བཅོལ་བའི་རྣམ་པ་ཧ་ཅང་མངོན་གསལ་རེད། ད་དུང་ཁྱིམ་བདག་དེའི་ནང་གི 70% ཡིག་རྨོངས་པ་དང་ཡིག་རྨོངས་ཕྱེད་ཅན་ཡིན་པས། བྱིས་པ་ལ་ལྡོག་ཕྱོགས་ཀྱི་སློབ་གསོ་ཐེབས་པ་མང་ཞིང་དྲང་ཕྱོགས་ཀྱི་སློབ་གསོ་ཐེབས་པ་ཉུང༌། ལྷག་པར་དུ་འུ་ཅག་གི་ཁྱིམ་བདག་རྣམས་ལ་མཚོན་ན།  སློབ་གསོའི་ཕྱོགས་ནས་པར་བསྐྲུན་བྱས་པའི་དཔེ་ཆ་དང་དུས་དེབ།  ཡང་ན་དགེ་རྒན་ཚོའི་སྙིང་ནས་བརྡོལ་བའི་འབོད་སྐུལ་གྱི“རྩོམ་རལ”དག་ལ་ཕ་མ་སུ་ཞིག་གིས་བལྟ་ཤེས་ཤིང༌། ཁྱིམ་བདག་སུ་ཞིག་གིས་བལྟས་མྱོང་ཨང༌། འདི་དག་ཀྱང་མདོར་དྲིལ་ནས་བཤད་ན་དུས་རབས་གསར་བའི་མིའི་རིགས་ཀྱི་ལས་དབང་ཁ་ལོ་བསྒྱུར་མཁན་ཚོའི་ཁོག་ན“དྲག་ཏུ་མཆོང་ལྡིང་བྱེད་བཞིན་པའི་སྙིང་གསོན་པོ་ཞིག”(དཔལ་དོན་གྲུབ་རྒྱལ་གྱི་ཚིག)གི་འཕར་ཚུལ་ཡིན་ཡང༌། ཡོད་ཚད་འཇིག་རྟེན་ཕྱི་མར་བཅོལ་བའི་ལུགས་སྲོལ་ཞིག་དང༌།  ཡང་ན“གསར་བ་ཐམས་ཅད་བདུད་ཀྱི་འཕྲུལ་དུ་སེམས”(མཁས་དབང་དགེ་འདུན་ཆོས་འཕེལ་གྱི་ཚིག)པའི་སྲོལ་ངན་འདི་དག་གིས། རེ་བ་དང་རེ་བཞག་ཅན་གྱི་བཻཌྰིརྱའི་བུམ་པ་དུ་མ་ཞིག་ས་ལ་བརྡབས་འགྲོ་བ་ག་ལ་མཁྱེན། ད་ནི་བོད་ཀྱི་ཁྱིམ་བདག་ཚོའི་གོ་རྟོགས་སྤེལ་ཆེད་དུ། མཁྱེན་སྤྱན་ཡངས་པའི་སྔོན་ཐོན་མི་རིགས་ཀྱི་ཁྱིམ་ཚང་སློབ་གསོ་ཡི་གཟིགས་མོ་ལ་ཐེངས་གཅིག་བལྟ།

  རྒྱའི་ལུའུ་ཞུན(鲁迅)གྱིས“བྱིས་པའི་ཕ་མ་རྩོམ་མཁན་ཞིག་ཡིན་ན།  བྱིས་པ་ཆུང་ཆུང་ཚོས་ཐོག་མར་ངོ་ཤེས་པའི་དངོས་པོ་ནི་ཤོག་བུ་དང་སྣག་ཚ།  སྨྱུ་གུ་སོགས་ཡིན་པ་དང༌།  བྱིས་པའི་ཕ་མ་ཤིང་བཟོ་མཁན་ཞིག་ཡིན་ཚེ།  དེ་དག་གི་བྱིས་པས་ཐོག་མར་སོག་ལེ་དང་སྟ་རེ།  ཤིང་འབིག་སོགས་ངོ་ཤེས་ངེས་ཡིན”(ཡིད་ངོས་ཀྱི་ཚིག་ཇི་བཞིན་བྲིས་

                              རྩོམ་ཁུངས། མཚོ་སྔོན་པོ་དྲ་བ།