བྲོ་དང་གླུ་ཡི་དོན།
ཤེས་རབ།
འབྱུང་ཁུངས།བོད་ལྗོངས་མཕྲིན་དྲ། སྤེལ་མཁན།དྲྭ་ཚིགས་དོ་དམ་པས། སྤེལ་དུས།2019-05-22

       འདིར་དམངས་ཁྲོད་ཀྱི་བྲོ་གླུ་འགའ་ཞིག་བསྡུས་ཡོད་པ་ནས། བྲོ་ཡི་གོ་རིམ་དང་ཇི་ལྟར་རྡུང་ཚུལ། གླུ་ཡི་བྱུང་རིམ་དང་ཇི་ལྟར་ལེན་ཚུལ་སོགས་ཀྱི་ངོ་སྤྲོད་མདོར་བསྡུས་ཤིག་ཞུས་ན། སྤྱིར་བྲོ་ཞེས་པའི་གོ་དོན་ལ་མི་འདྲ་བ་གཉིས་བཤད་རྒྱུ་འདུག་པ་ལས། དང་པོ་ལྟར་ན་བྲོ་ནི་བདེ་སྡུག་གི་ཚོར་བ་སྟེར་ནུས་པའི་དངོས་པོ་ཞིག་སྟེ་མངར་སྐྱུར་གྱི་བྲོ་བ་ལྟར་རོ། ཁ་ཟས་སོགས་རོ་ཡི་བྲོ་བ་ནི་དབང་པོ་གཅིག་སྟེ་ལྕེ་ཁོ་ནའི་ཡུལ་དུ་གྱུར་ཅིང༌། ཞབས་བྲོ་ནི་བྲོ་པ་རང་གི་སྣ་མ་གཏོགས་པའི་དབང་པོ་ཐམས་ཅད་དང༌། གཟིགས་མོ་མཁན་གྱི་མིག་ཡིད་རྣ་བ་གསུམ་ཀའི་ལོངས་སྤྱོད་དུ་གྱུར་ནས་དགའ་བདེའི་ཚོར་བ་འགོག་མེད་དུ་སྟེར་བར་བྱེད་པས་ན་བྲོ་ཞེས་ཟེར། གདངས་ཀྱི་ཁྱད་པར་འགའ་ཞིག་སྣ་ལ་གནས་པས་ན་བྲོ་པ་རང་གི་དབང་པོ་ཐམས་ཅད་ལ་བརྟེན་པར་བཤད་པ་ཡང་ཡོད། 
      གཉིས་པ་ལྟར་ན་བྲོ་ནི་དྲོ་ཡི་དོན་ཏེ། ཁ་དྲོ་ཞིང་བཀྲ་ཤིས་པའི་རྟེན་འབྲེལ་ཡོད་པས་ན་དྲོ་ཟེར་ཞིང༌། ཡང་ན་ཞབས་གཉིས་ཀྱིས་ལུས་མ་དྲོ་བར་ས་ལ་རྡུང་བས་ན་དྲོ་རྡུང་བ་ཟེར། འགའ་ཞིག་ནས་ཟེར་ན་ལྟ་བྲོ་བས་བྲོ། ཉན་བྲོ་བས་བྲོ། དགོད་བྲོ་བས་བྲོ་ཡིན་ཟེར། 
      བྲོ་ཡི་ཆོ་ག་ཆ་ཚང་ཞིག་བྱེད་པ་ནི་འཇིག་རྟེན་ཁྱིམ་གཞི་ཞིག་འཛུགས་པ་དང་ཚུལ་མཐུན་པ་སྟེ། མཛད་སྒོ་ཆེ་རིགས་དང་བླ་ཆེན་དཔོན་ཆེན་ཁག་ཕེབས་སྐབས་སོགས་སུ་བྲོ་རྡུང་བའི་རིམ་པ་ནི། དང་པོ་བྲོ་ར་ས་གཡར། དེ་ནས་བྲོ་ར་སྦ་ཕུབ། དེ་ནས་བྲོ་ར་གདན་བཏིང༌། དེ་ནས་འཛོམས་བྲོ། དེ་ནས་བྲོ་མཆོད། དེ་ནས་ཆོས་བྲོ། དེ་ནས་བྲོ་ཆེན། དེ་ནས་བྲོ་གཞུང༌། བྲོ་གཞུང་ལ་སླེབས་ན་བྲོ་ལ་ཁ་ཚར་བཏགས་པ་དང༌། གཞས་མ་བྲོ་འཁྲབ་པ་སོགས་བྱེད། དེ་ནས་གཟིམ་བྲོ་རྡུང་སྟེ་མཇུག་བསྡུ་བ་ཡིན་ཅིང༌། དེ་ནི་འཇིག་རྟེན་འདིར་ཁྱིམ་གཞི་ཞིག་བཟུང་བ་ལ་དང་པོ་ཡུལ་ལྷ་གཞི་བདག་ལས་ས་བསླངས། དེ་ནས་མཁར་བརྩིགས། དེ་ནས་གདན་བཏིང༌། དེ་ནས་མགྲོན་འབོད་དེ་སྒོ་འབྱེད་བྱེད་པ་ནས་འགོ་བཙུགས་ཏེ་ལེའུ་མང་པོ་ཞིག་བསྟར་ལ་བརྒྱུས་ནས་བྱེད་པ་དང་ཆོས་མཚུངས་པ་ཡིན། 
      དེ་ཡང་བྲོ་ར་ས་གཡར་ནི་ཐོག་མའི་བྱ་བ་སྟེ། ས་ཆ་གང་ཞིག་ལ་བྲོ་རྡུང་བར་ཡུལ་ལྷ་གཞི་བདག་སོགས་ཀྱི་རུ་ང་ཕྲག་དོག་མི་འབྱུང་ཆེད་བྲོ་ར་གཡར་ནས་བྱིན་འབེབས་ཀྱིས་ས་འདུལ་བྱེད་པ་ཞིག་ཡིན། བྲོ་ར་སྦ་ཕུབ་དང་བྲོ་ར་གདན་བཏིང་གཉིས་ནི་བྲོ་མགྲོན་རྣམས་ཀྱི་བཞུགས་གནས་གྲ་སྒྲིག་ཙམ་ཡིན་ཅིང༌། འཛོམས་བྲོ་ནི་བླ་མ་སངས་རྒྱས་དཔའ་བོ་མཁའ་འགྲོ་ལྷ་ཀླུ་གཞི་བདག་སོགས་བྲོ་མགྲོན་རྣམས་འཛོམས་བརྡ་ཕུལ་ནས་བྲོ་ལ་གཟིགས་པར་གདན་ཞུས་བྱེད་པ་ཞིག་ཡིན། བྲོ་མཆོད་ནི་གདན་ལ་བཞུགས་པའི་བྲོ་མགྲོན་རྣམས་ལ་ཐོག་མར་བྲོ་ཡི་མཆོད་པ་འབུལ་བ་ཞིག་སྟེ། དེ་དག་ནི་བྲོ་ཡི་སྔོན་འགྲོའི་རིམ་པ་རྣམས་ཡིན་ནོ། 
      བྲོ་ཡི་དངོས་གཞི་ལ་འཇུག་པའི་ཐོག་མར་རྟེན་འབྲེལ་དང་བྱིན་རླབས་ལ་བསམས་ནས་དང་པོ་ཆོས་བྲོ་རྡུང་ཞིང༌། དེ་ནས་བྲོ་ཆེན་ཁག་ནས་རིམ་པར་རྡུང་སྟེ་མཇུག་ཏུ་གཟིམ་བྲོ་རྡུང་བ་ཡིན། འོན་ཀྱང་རིམ་པ་འདི་ཆབ་མདོའི་མངའ་ཁུལ་ཡོངས་ལ་གཅིག་མཚུངས་སུ་ཁྱབ་པ་ནི་མ་ཡིན་ཏེ། ལུང་པ་འགའ་ཤས་ཀྱིས་དང་པོ་ཆོས་བྲོ་རྡུང་ན་བགེགས་བར་རྣམས་རང་བཞིན་གྱིས་ཞི་ཞིང་ཆོས་མཐུན་ཡིད་བཞིན་དུ་འགྲུབ་པ་དང༌། 
      མཇུག་ཏུ་འཛོམས་བྲོ་རྡུང་ན་ཡང་ཡང་འཛོམས་པའི་རྟེན་འབྲེལ་ཡོད་པར་འདོད། ཡང་ལུང་པ་འགའ་ཤས་ཀྱིས་མཇུག་ཏུ་འཛོམས་བྲོ་རྡུང་ན་ཕ་རོལ་པོ་ལ་བྲོ་ངོམ་དང་ཤགས་འདེབས་པར་རྩི་ཞིང༌། མཇུག་ཏུ་ཤིས་བྲོ་ཟེར་བ་བཀྲ་ཤིས་པའི་བྲོ་ཞིག་རྡུང་རྒྱུ་ཡོད་སྐད་ཀྱང་གང་འདྲ་ཡིན་མིན་མ་ཤེས། དེ་ལ་སོགས་པ་ལུང་པ་སོ་སོར་བྲོ་ཡི་གོ་རིམ་ཡང་སོ་སོར་ཡོད་པ་ཡིན། མཛད་སྒོ་ཆེ་ཁག་གཅིག་ལ་བྲོ་ཡོད་ཚད་རྡུང་མི་ཐུབ་ཀྱང་བྲོ་ཡི་ལེའུ་དེ་རྣམས་མ་ལུས་པར་དགོས་ཤིང༌། སྤྲོས་ཚེ་བྲོ་ཆེན་དང་བྲོ་གཞུང་སོགས་ལ་བྲོ་ཡི་ཁ་ཚར་བཏགས་ནས་རྡུང་ན་ཉིན་མཚན་བཅོ་བརྒྱད་ལ་འཁྲབ་ཀྱང་རྫོགས་མཐའ་མེད་སྐད། 
      དེ་ཡང་བྲོ་ར་ས་གཡར་དང་བྲོ་ར་སྦ་ཕུབ་བྲོ་ར་གདན་བཏིང་བྲོ་མཆོད་འཛོམས་བྲོ་ཆོས་བྲོ་དང་གཟིམ་བྲོ་སོགས་ནི་བརྗོད་བྱ་དོན་ལ་ལྟོས་ནས་བཏགས་པ་དང༌། བྲོ་ཆེན་དང་བྲོ་གཞུང་གཞས་མ་བྲོ་སོགས་ནི་གདངས་རིང་ཐུང་ལ་ལྟོས་ནས་བཏགས་པ་ཡིན་ནམ་སྙམ་ཞིང༌། བྲོ་ཡི་ཁ་ཚར་ནི་གདངས་དབྱངས་འགྱུར་ཁུག་ཅི་འདྲ་ཞིག་ནང་བཅུག་ཀྱང་ཆོག་པ་མ་ཟད། བསོ་ཡ་ལ། འོའོ་ལ་ཟི། སོགས་ཚིག་ལྷག་མ་གང་འདྲ་ཞིག་བཏགས་ཀྱང་ཆོག་པས་ན་བྲོ་ཡི་ཁ་ཚར་ཞེས་ཟེར། བྲོ་པ་ཕན་ཚུན་བྲོ་ཤགས་འདེབས་རེས་ཀྱིས་འཁྲུགས་ཆ་དང་ཛ་དྲག་ཇེ་ཆེར་འགྲོ་བའི་སྐབས་རང་རང་གི་རྣམ་དཔྱོད་ལ་གཞིགས་པའི་བྲོ་ཡི་ཁ་ཚར་འདི་བེད་སྤྱོད་མང་བ་གཏོང་བ་ཡིན། འགའ་ཞིག་ནས་ཟེར་ན། བྲོ་ཡི་ཁ་ཚར་ནི་ཕོ་གཞོན་མོ་གཞོན་བར་རམ་ལུང་པ་ཕན་ཚུན་ནམ་གང་ལྟར་བྲོ་པ་ཕན་ཚུན་བྲོ་ཤགས་ཚད་སྐབས། བྲོ་ཆེན་དང་བྲོ་གཞུང་སོགས་ཀྱི་མཐར་སྐབས་བསྟུན་གྱིས་བསྣན་ནས་རྡུང་བའི་བྲོ་ཡི་རིགས་ལ་བྲོ་ཡི་ཁ་ཚར་ཟེར་ཞེས་ཟེར། འགྲེལ་བཤད་དེ་གཉིས་རྣམ་པ་ཀུན་ཏུ་འགལ་བ་ཞིག་མིན་ཀྱང་ཕྱི་མ་འདི་བདེན་ཤས་ཆེ་སྟེ། དར་རས་སྣམ་འཕྲུག་སོགས་ཀྱི་མཐའ་སྣེ་ལ་དཔྱངས་པའི་རྒྱུ་སྐུད་ལ་འཇིག་རྟེན་ན་ཁ་ཚར་ཞེས་གྲགས་པ་བཞིན་ནོ། །
      དེ་ཡང་ཆབ་མདོ་ཡུལ་མི་ཚོས་བྲོ་རྡུང་བྲོ་འཆམ་བྲོ་འཁྲབ་སོགས་གང་བདེར་བརྗོད་སྲོལ་ཡོད་ཀྱང༌། གར་འཁྲབ། འཆམ་རྒྱག གཞས་གཏོང༌། གླུ་ལེན་ཞེས་བརྗོད་པ་ལས་གར་རྡུང༌།  འཆམ་འཁྲབ། གཞས་འཆམ། གླུ་གཏོང་སོགས་བརྗོད་སྲོལ་མེད། དེ་ནི་འབྲོག་པ་ཚོས་རྟ་རྟོད། ནོར་བཏགས།  ཁྱི་སྐོར་ཞེས་བརྗོད་པ་ལས་རྟ་སྐོར། ནོར་རྟོད། ཁྱི་བཏགས་ཞེས་ཤོད་སྲོལ་མེད་པ་ལྟར་བརྗོད་དོན་གཅིག་ཀྱང་བྱ་བའི་ཡུལ་གྱི་རྣམ་དབྱེ་འབྱེད་པའི་དོན་དུ་བྱ་ཚིག་གི་རྣམ་གྲངས་ཐ་དད་པ་སྨྲ་བ་དང་མཚུངས། 
      བྲོ་རྡུང་བའི་སྐབས་ཀྱི་ཉམས་འདོན་ལུགས་སམ་བྲོ་འཆམ་སྟངས་ལ་བལྟས་ནས་འདྲ་བ་རྒྱུ་མཚན་དུ་བྱས་པའི་མིང་འདོགས་མང་པོ་ཡོད་དེ། དཔེར་ན། བྱ་རྒོད་བྲོ་རྡུང་ཞེས་བྱ་རྒོད་ཐང་ལ་འབབ་སྐབས་ཉམས་དང་བཅས་སྐོར་འཆམ་བྱེད་པ་འདྲ་བའི་བྲོ་འཆམ་པ་ལྟ་བུའོ། དེ་བཞིན་དུ་ཅང་ཤེས་འདུར་འཆམ། རྨ་བྱ་ལྡེམ་འཆམ། མེ་ཏོག་འཐུ་འཆམ། བུམ་པ་འཛིན་འཆམ། ཁྱུང་ཆེན་ལྡིང་འཆམ། སབ་མ་སླས་འཆམ། མ་མོ་སྟར་འཆམ། བཞོན་མ་འོ་འཆམ། རླུང་དམར་འཚུབ་འཆམ། གཡས་སྐོར་དགའ་འཁྱིལ་མ། གཡོན་སྐོར་གཡུང་དྲུང་མ། ཤྭ་ཕོ་སྒང་འགྲེམ་མ། མདུད་ནག་དགུ་བཀྲོལ་མ། ལྕང་མ་རླུང་སྤྱོད་མ། བྱེ་མ་ཆུ་སིག་མ། སྒར་སྟོད་དྲེལ་སྦྲེལ་མ། གོམ་ཤུད[ཤུད་ནི་ཟག་པའི་དོན]མ། རྡོག་རྐྱང་མ། རྡོག་རྩག[ཆ་བཅས་ཀྱི་དོན]མ། པ་ཊ་གཉིས་རྩག་མ། པ་ཊ་སུམ་རྩག་མ་ཟེར་བ་སོགས་མང་པོ་ཡོད། 
      ད་དུང་བྲོ་ཡི་རིགས་ཐམས་ཅད་ལ་ཐུན་མོང་དུ་ཁྱབ་པའི་སྒྲོམ་གཞི་གཅིག་ཡོད་པ་ནི། བྲོ་ཡི་འགོར་དལ་ཞིང་འགྱིངས་ཆེ་བ། བར་དུ་ཅུང་མྱུར་ཞིང་བག་ཆགས་པ། མཇུག་ཏུ་ཆེས་མྱུར་ཞིང་འཁྲུགས་ཆེ་བ་བཅས་ཡིན། འགའ་ཤས་ནས་བྲོ་པ་སྐུ་ཚེ་རིང་བའི་རྟེན་འབྲེལ་ཡོད་ཟེར་ནས་མཇུག་གི་ཚིག་རྐང་གཅིག་དལ་ཞིང་གདངས་རིང་ཙམ་འཐེན་སྲོལ་ཡོད། ཐོག་མར་དལ་བའི་སྐབས་གཙོ་བོ་གདངས་ཀྱི་འགྱུར་ཁུག་གི་ཉམས་འདོན་པ་དང༌། བར་དུ་ཅུང་མྱུར་བའི་སྐབས་གཙོ་བོར་ལུས་ཀྱི་གར་སྟབས་ཀྱི་ཉམས་འདོན་པ་དང༌། མཐར་ཤིན་ཏུ་མགྱོགས་པའི་སྐབས་གཙོ་བོར་རྐང་པའི་བདེ་རྩལ་གྱི་ཉམས་འདོན་པ་ཡིན། 
      ཤིན་ཏུ་མགྱོགས་པའི་སྐབས་སུ་བུ་རྣམས་ཕྱི་ཕྱོགས་སུ་སྐོར་བ་ཆེ་ཙམ་སྐྱོད་པ་དང་བུ་མོ་རྣམས་ནང་ལོགས་ནས་སྐོར་བ་ཆུང་ཙམ་བྱེད་དགོས། དེའི་རྒྱུ་མཚན་ནི་བུ་རྣམས་མགྱོགས་པའི་སྐབས་འཕག་མཆོང་ཆེ་ཙམ་བརྒྱབ་ཀྱང་མཛེས་ཉམས་མི་འཆོར་མོད། བུ་མོ་རྣམས་གོམ་ཞེང་ཆེན་པོ་སྤོ་བ་དང་རྒྱང་རིང་དུ་མཆོང་བ་སོགས་བྱས་ན་མི་མཛེས་སྟབས་ནང་དུ་འཛུལ་ནས་རྡོག་བྲོ་འགྲིགས་ཙམ་ལས་གོམ་ཞེང་ཆེན་པོ་སྤོ་མི་དགོས་པར་སྐོར་ཐག་ཐུང་དུ་གཏོང་བ་ཞིག་ཡིན། གལ་ཏེ་བྲོ་པ་ཕྱོགས་གཉིས་བར་མང་ཉུང་ཤོར་ཡོད་ན་གང་མང་བ་དེ་ཕྱི་དང་ཉུང་བ་དེ་ནང་དུ་འཛུལ་དགོས། ཉུང་བ་དེ་ཕྱི་ལ་ཐོན་ན་འཐོར་ཆེ་བས་མཛེས་ཆ་འཆོར་འགྲོ། 
      འདིར་ཨ་སྔོན་མཐོན་པོ་ཟེར་བའི་བྲོ་སྣ་མང་པོ་ཞིག་ཡོད་པ་དེ་དག་ནང་གསེས་ཀྱིས་བྲོ་སྦ་ཨ་སྔོན་མཐོན་པོ་ཆེ་འབྲིང་དང༌། བྲོ་གཞུང་ཨ་སྔོན་མཐོན་པོ་ཆེ་ཆུང་སོགས་ལེ་ཚན་དེའི་མིང་དང་སྦྱར་ནས་འབོད་སྲོལ་ཡོད། སྤྱིར་ཆབ་མདོའི་བྲོ་ལ་ཨ་སྔོན་མཐོན་པོ་ཟེར་བ་བརྒྱ་དང་བརྒྱད་ཅུ་ཙམ་ཡོད་པར་གྲགས་ཤིང༌། དེ་ཡང་ཤོད་སྲོལ་ཙམ་མིན་པར་དེ་རྣམས་ཚང་མ་རྡུང་ཤེས་པའི་མི་སྣ་དེང་སང་ཡང་ཆབ་མདོར་ཡོད་འདུག་ཅིང༌། ཆབ་མདོའི་ཁ་དཔེ་ལ་ཡང”སེ་ལ་སྐྱ་སྐྱ་མེད་ཀྱང་བྲོ་ལ་ཨ་སྔོན་མཐོན་པོ”ཟེར་སྲོལ་ཡོད་པ་རེད། དེའི་གོ་དོན་ལ་དཔེ་ཐོབ་དང་དོན་ཐོབ་གཉིས་ཡོད་པ་ནས། དཔེ་ཐོབ་ཀྱི་དབང་དུ་བྱས་ན་རང་ནུས་དང་མ་འཚམས་པའི་འུར་ཤོབ་ཤོད་པ་ལ་ཟེར། དོན་ཐོབ་ཀྱི་དབང་དུ་བྱས་ན་ཆབ་མདོའི་མི་རྣམས་བྲོ་རྡུང་བའི་དར་སྲོལ་ཆེ་དྲགས་ནས། ཁ་ལ་རྩམ་པ་ཟ་རྒྱུ་མེད་ཀྱང་བྲོ་ལ་ཨ་སྔོན་མཐོན་པོ་ཟེར་ནས་རྡུང་གིན་ཡོད་པ་དེ་རེད། 
      འདིར་གསལ་བཤད་དགོས་པ་ཞིག་ལ། ཆབ་མདོའི་བྲོ་ཞེས་བརྗོད་པ་ནི་ཆབ་མདོའི་ཡུལ་མི་ཚོས་རྟག་པར་རྡུང་བཞིན་པའི་བྲོ་ལ་ཆབ་མདོའི་བྲོ་ཞེས་བརྗོད་པ་ལས། ཚིག་གི་བརྗོད་བྱ་ངག་གི་འགྱུར་ཁུག་རྐང་པའི་འགྲོས་དང་ལག་པའི་གར་སྟབས་སོགས་ཚང་མ་ཆབ་མདོ་བ་ཞིག་གིས་བརྩམས་པའི་གོ་དོན་གང་ཡང་ལྡན་མེད། འོན་ཀྱང་དེ་ལས་གཞན་པ་ཞིག་གིས་བརྩམས་པའི་ཁུངས་སྐྱེལ་གྱི་དཔང་རྟགས་ཀྱང་སུ་ཞིག་ལ་ཡང་ཡོད་མི་སྲིད་སྙམ། ཆབ་མདོ་བའི་ཁ་རྒྱུན་ལ་བྲོ་དེ་དག་མང་ཆེ་བ་ནི་འཕགས་ཆེན་ཡབ་སྲས་རྣམས་ཀྱིས་བརྩམས་པར་གྲགས་ཤིང༌། ཕྱིས་ཀྱི་བྲོ་འགའ་ཞིག་འཇམ་མགོན་མི་ཕམ་རིན་པོ་ཆེ་དང༌། བྲག་གཡབ་གདོང་ཀོང་སྤྲུལ་ནས་བརྩམས་པའི་ཤོད་སྲོལ་ཡང་འདུག གཅིག་བྱས་ན་བྲོ་སྣ་ཁ་ཤས་ཡུལ་གྲུ་གཞན་ནས་དར་ཁྱབ་བྱུང་བ་ཡིན་སྲིད་ཀྱང༌། བྲོ་དེ་དག་མང་པོ་ཞིག་ཏན་ཏན་འཕགས་ཆེན་ཡབ་སྲས་རྣམས་ཀྱིས་བརྩམས་པར་ལོ་རྒྱུས་བཤུལ་བཞག་གི་ཐོག་ནས་ར་སྤྲོད་བྱེད་ཐུབ། “གཙང་རིས་གཙང་ལ་ཡོད་པ”ཞེས་པའི་བྲོ་དེ་ནི་འཕགས་པ་ལྷ་སྐུ་ཕྲེང་དྲུག་པ་འཇིགས་མེད་བསྟན་པའི་རྒྱ་མཚོ་མཆོག་གཙང་བཀྲ་ཤིས་ལྷུར་པོར་ཕེབས་ཏེ། པཎ་ཆེན་བློ་བཟང་ཡེ་ཤེས་ཀྱི་དྲུང་ནས་དགེ་ཚུལ་གྱི་བསླབ་པ་རྫོགས་པའི་དགའ་སྟོན་སྐབས་འཕགས་པ་ལྷ་རང་ཉིད་ནས་ཐོལ་བྱུང་དུ་བརྩམས་གནང་བ་དང༌། “འབའ་ལེ་ཐང་འོ་མའི་མཚོ་ཁ་ནས”ཟེར་བའི་བྲོ་དེ་ནི་འཕགས་པ་ལྷ་སྐུ་ཕྲེང་བདུན་པ་ལེ་ཐང་དུ་འཁྲུངས་ནས་དེར་ངོས་འཛིན་མཛད་སྒོ་སྐབས་ལྕགས་ར་སྤྲུལ་སྐུས་བརྩམས་པ་རེད་ཟེར་སྲོལ་མཆིས། 
      ལྷག་པར་འཕགས་པ་ལྷ་ནི་བྲོ་དང་གར་འཆམ་སོགས་དམངས་ཁྲོད་སྒྱུ་རྩལ་རིགས་ལ་དགའ་པོ་གནང་མཁན་ཞིག་ཡིན་པ་ནི། ཁོང་གིས་སྲོལ་གཏོད་པའི་གར་སྣ་བརྒྱད་བཅུ་འཁྲབ་པའི་ཆབ་མདོའི་དགུ་ཆེན་ཞེས་གྲགས་པར་དེང་སང་བར་ལོ་ལྟར་ཕྱོགས་མཐའ་དབུས་མེད་ནས་མི་ཚོགས་གྲོག་ཚང་ལྟར་རྡོལ་ཡོང་སྟེ་ཁ་ནང་ཐལ་བ་འཛུལ་ཡང་མ་ཚོར་བར་ལྟ་བཞིན་པ་འདིས་ཀྱང་ཤེས་ཐུབ། གར་ཚིག་དེ་དག་གསང་བ་བྱེད་སྲོལ་ཡོད་པས་དོན་གྱི་འདྲ་མ་ཇི་བཞིན་མི་ཤེས་ཀྱང༌། འཕགས་ཆེན་ཡབ་སྲས་རྣམས་ཀྱི་སྐུ་ཕྲེང་གོང་མ་མང་པོ་ཞིག་ཉང་ལོང་ཀོང་གསུམ་དུ་འཁྲུངས་ཤིང༌། ཁོང་རྣམ་པའི་མཛད་འཕྲིན་ཡང་ཉང་ལོང་ཀོང་གསུམ་ནས་འགོ་བཙུགས་ཏེ་རྒྱས་པ་ཞིག་ཡིན་འདུག་པས། གར་གྱི་གདངས་དང་དབྱངས་ཀྱི་འགྱུར་ཁུག་རྣམས་ཀོང་གཞས་ཀྱི་གདངས་དང་འདྲ་བའམ་དེའི་ཤུགས་རྐྱེན་ཆེན་པོར་ཐེབས་ཡོད། ད་དུང་ཁོང་རྣམས་ཀྱི་གམ་དུ་སྒྲུང་མཁན་མང་པོ་ཉར་ནས་རྟག་པར་སྒྲུང་ཤོད་བཅུག་གི་ཡོད་འདུག་ཅིང༌། འཇམ་མགོན་མི་ཕམ་རིན་པོ་ཆེས་ཀྱང་སྒྲུང་པ་ཐམས་ཅད་ཀྱི་ནང་ནས་འཕགས་ལྷའི་གམ་བཅར་ཆབ་མདོའི་སྒྲུང་པ་རྣམས་ཚད་མར་འཛིན་གྱི་ཡོད་སྐད། 
      མདོར་ན། ྋགོང་ས་ལྔ་པ་ཆེན་པོས་”མདོ་ཁམས་མུན་སེལ་སྒྲོན་མེ”ཞེས་ཆེས་ཆེར་བསྔགས་པའི་ཆབ་མདོའི་འཕགས་ཆེན་ཡབ་སྲས་རྣམས་ཀྱིས་མདོ་ཁམས་ཀྱི་ལྗོངས་དེར་ཆོས་སྲིད་ཙམ་དུ་མ་ཟད། གར་འཆམ་བྲོ་གཞས་གླིང་སྒྲུང་སོགས་དམངས་ཁྲོད་སྒྱུ་རྩལ་གྱི་རྣམ་གྲངས་མང་པོ་སྨག་ལ་སྒྲོན་མེ་བཏེགས་པ་ལྟར་མཛད་ཅིང༌། དེ་ཡང་མེད་པ་ནས་ཡོད་པ་དང་ཡོད་པ་ནས་གོང་འཕེལ་དུ་འགྲོ་བའི་ཕྱོགས་ལ་བསུབ་ཏུ་མེད་པའི་མཛད་རྗེས་རླབས་ཆེན་བཞག་ནས་སྣང༌། 
      གཉིས་པ། ཆབ་མདོའི་དམངས་ཁྲོད་ཀྱི་གླུ་ཁ་ཤས་བསྡུ་སྒྲིག་བྱས་ཡོད། སྤྱིར་གནའ་བོའི་དུས་སུ་འདུ་འཛོམས་མཛད་སྒོ་ཆེ་ཁག་ཐོག་རྒྱལ་བློན་རྣམས་དང་མི་ཆེན་བླ་ཆེན་ཚོས་གླུ་ལེན་སྲོལ་ཡོད་ཅིང༌། ཕྱི་རབས་ཚོས་དེ་ལ་ཞེ་སའམ་འབྱུང་ཁུངས་དང་སྦྱར་ནས་མགུར་གླུ་ཞེས་ཟེར། མགུར་གླུ་དེ་དག་ནི་སྤྱིར་བཏང་གི་ཚིགས་བཅད་རེ་ཟུང་ཙམ་མིན་པར་དེང་དབྱིན་སྐད་དུ་ལེགས་སྦྱར་lectureཟེར་བ་བཤད་པའི་ཚོད་ལྟར་ཡིན་ལ། དེ་འདྲའི་ཚིགས་བཅད་ཀྱི་རྣམ་པའི་ཐོག་བརྗོད་གཞི་ཆ་ཚང་བའི་གླུ་ཞིག་ལེན་པར་དྲན་ཁ་སྐྱེན་ལ་སྡེབ་སྦྱོར་ལེགས་པོ་ཞིག་དགོས་པས་ལས་སླ་པོ་གཏན་ནས་མེད། དེར་བརྟེན་གླུ་ལེན་པའི་ཐོག་མར་ལྷག་པའི་ལྷ་ཡི་མཚན་ནས་འབོད་དེ་གླུ་སྣ་དྲངས་པར་བསྐུལ་བ་དང༌། དྲན་ཁ་མྱུར་བའི་མི་ཞིག་འཁྲིས་སུ་འཇོག་པ་ལ་གླུ་ཡི་སྐྱོར་རོགས་ཞེས་ཟེར། གལ་ཏེ་མི་མང་འདུ་འཛོམས་དེ་འདྲའི་ཐོག་གླུ་ལེགས་པོ་ཞིག་ལེན་ཐུབ་པ་ཡིན་ན་མི་དེའི་སྙན་གྲགས་ནི་སྟོང་གསུམ་སྐད་ཀྱིས་ཁྱབ་པར་གདོན་མི་ཟ། 
      ཡི་གེ་མེད་པའི་དུས་དང་ཡི་གེ་མེད་པའི་སྤྱི་ཚོགས་གཅིག་ནང་གལ་ཆེའི་གཏམ་རྣམས་དེ་འདྲའི་ཚིགས་བཅད་ཀྱི་རྣམ་པའི་གླུ་རུ་ལེན་པ་ནི། ཚིག་དོན་གཉིས་ཀ་ལས་སླ་པོ་བློར་ངེས་ཏེ་ཁ་ནས་ཆུ་ལྟར་རྒྱུག་ཐུབ་པའི་དགེ་མཚན་ཆེན་པོ་ཡོད། འཇིག་རྟེན་འདིར་ཡི་གེ་ཁྱབ་བདལ་ཕྱིན་པ་ནས་སྲོལ་ལུགས་དེ་ནི་ལོ་རྒྱུས་ཙམ་དུ་གྱུར་ན་ཡང༌། ལོ་རྒྱུས་དེ་ཡིག་ཐོག་བཀོད་པ་ལས་དེང་ང་ཚོས་སྤྱོད་བཞིན་པའི་བྲོ་གླུ་གཞས་གསུམ་གྱི་རྨང་གཞི་བརྟན་པོ་ཞིག་ཚུགས་ཐུབ་པ་བྱུང༌། ཞབས་བྲོ་དང་གར་སྟབས་ཀྱི་རིགས་མང་པོ་ཞིག་གནའ་བོའི་མིའམ་ཀློ་པའི་ཞབས་བྲོ་ལས་བྱུང་བ་ཡིན་ཤས་ཆེ་ཡང༌། དེང་གི་གླུ་གཞས་འདི་དག་གི་འབྱུང་ཁུངས་ནི་སྔར་གྱི་མགུར་གླུ་དེ་དག་ཡིན་པར་ཐེ་ཚོམ་མ་དགོས། ཕྱིས་སུ་རྣམ་གཞག་དེ་དག་གྲ་ཇེ་རྒྱས་སུ་ཕྱིན་པ་ལས་གར་འཆམ་བྲོ་གཞས་གླུ་སོགས་རྣམ་གྲངས་མང་པོ་འཕེལ་རྒྱས་བྱུང་བར་སྙམ། 
      བྲོ་ཡི་དོན་ནི་གོང་དུ་བཤད་ཟིན་ལ། གླུ་ནི་དགའ་སྡུག་སྐྱོ་གསུམ་ཤུགས་ཆེར་འབྱུང་བའི་གནས་སྐབས་སུ་མགུལ་ནས་རང་དབང་མེད་པར་ལུད་ཡོང་བས་ན་མགུར་གླུ་ཞེས་ཟེར། གར་ནི་འཕགས་མཆོང་དང་བཅས་མྱུར་བར་རྒྱུག་པའི་དོན་ཏེ་ཤྭ་བ་འཁྲབ་པ་ནི་གར་གྱི་དཔེ་མཚོན་ཆེ་ཤོས་ཡིན་པ་ལྟར་དང༌། རྒོ་བ་རྒྱུག་པ་ལ་རྒོ་བ་གར་ཞེས་བརྗོད་པ་བཞིན་ནོ། འཆམ་ནི་རྒྱང་རིང་པོར་མི་འགྲོ་པར་འཁོར་ས་གཅིག་ལ་ཕར་འགྲོ་ཚུར་འགྲོ་བྱེད་པའི་དོན་དང༌། གཞས་ནི་བཞེས་དང་ཡང་ན་བཞད་ཀྱི་དོན་ཡིན་ནམ་སྙམ་ཞིང༌། ཡང་ན་གནའ་བོའི་བྲོ་ཤོན་ཞེས་པ་ཟུར་ཆག་ནས་བྲོ་གཞས་གྱུར་པའམ། རྣམ་པ་གཅིག་ཏུ་ན་རྒྱུ་མཚན་ཅི་ཡང་བཤད་དུ་མེད་པའི་འདོད་རྒྱལ་ཙམ་ཡིན་ཀྱང་སྲིད། གང་ལྟར་ང་ཚོའི་ལུང་པར་གཞས་དེ་ཙམ་གཏོང་སྲོལ་མེད་པས་གཞས་ཀྱི་ལོ་རྒྱུས་མང་པོ་ཤོད་རྒྱུ་མེད་ཅིང༌། ཐ་ན་གཞས་ཀྱི་ཐ་སྙད་དེ་ཡང་ག་དུས་བྱུང་བ་ཤེས་ཀྱི་མེད། གདངས་དང་ཉམས་ལ་བལྟས་ན་གཞས་མ་བྲོ་ཟེར་བ་འདི་ཡང་ཕལ་ཆེར་ཕྱིས་སུ་བྱུང་བ་ཞིག་རེད། 
      འོན་ཀྱང་བྲོ་དང་གླུ་ཡི་ཐ་སྙད་ནི་གནའ་སྔ་མོ་ཞིག་ནས་ཡོད་པར་ངེས་ཏེ། རྒྱལ་པའི་བཀའ་བསྟན་དུ་མར་དེ་བཞིན་གཤེགས་པའི་གླུ། རྡོ་རྗེའི་གླུ། ཆོས་ཀྱི་གླུ། དཔའ་བོའི་བྲོ། དཔའ་མོའི་བྲོ། མཁའ་འགྲོའི་བྲོ་ཟེར་བ་སོགས་ཡོད་པ་མ་ཟད། བོན་གྱི་བསྟན་བཅོས་རྙིང་པར་བྲོ་དང་ཤོན་གྱི་ཐ་སྙད་མང་པོར་སྣང༌། བོད་ཀྱི་ས་ཆ་ཁ་ཤས་སུ་མ་མཁའ་འགྲོའི་བྲོ་རྭ་ཟེར་བའི་གནས་རྩ་ཆེན་དེ་འདྲ་ཡང་ཡོད། འོན་ཀྱང་གཞས་ཟེར་བའི་ཐ་སྙད་དེ་འདྲ་བསྟན་པ་སྔ་དར་སྐབས་སུ་ཕལ་ཆེར་གོ་རྒྱུ་ཨེ་ཡོད་ན་སྙམ། 
      གླུ་ལ་མགུར་གླུ་དང༌། འབྲོག་གླུ། ལ་གླུ། དཔྱིད་གླུ། དགའ་གླུ། ཇ་ཆང་མཚར་གླུ། རང་སེམས་གསོ་གླུ་ཟེར་བ་སོགས་རྒྱུ་འབྲས་དང་འདྲ་འབྲེལ་གྱི་སྒོ་ནས་མིང་འདོགས་སྣ་ཚོགས་ཡོད་ཅིང༌། བཀའ་ཐང་སྡེ་ལྔ་དང་གླིང་སྒྲུང་ཁག་ཏུ་གཟིགས་པ་ཡིན་ན། སྔོན་དུས་སུ་མི་རེ་ལ་གླུ་རེ་དང་གླུ་རེ་ལ་མིང་རེ་ཡོད་པར་ཤེས་ཐུབ། མགུར་གླུ་ནི་མགུལ་ནས་བྱུང་བའི་གླུ་སྟེ་ར་སྒྲ་ཚིག་སྡུད་ཀྱི་དབང་གིས་འབྱུང་ཁུངས་ལ་འཇུག་པ་སྟེ།  “ལྷར་བཅས་འགྲོ་བ་ཡོངས་ཀྱི་བསོད་ནམས་ཀྱི་ཞིང་དམ་པ”ཞེས་པའི་ར་སྒྲ་ཚིག་སྡུད་ཀྱི་དབང་གིས་ལྷ་དང་བཅས་པའི་དོན་ཏེ་འབྱེད་སྡུད་ལ་འཇུག་པ་བཞིན་ནོ། །
      གླུ་འདི་རྣམས་ཡུལ་འབྲོག་གཉིས་ལས་འབྲོག་པ་ཚོས་མང་བ་ལེན་གྱི་ཡོད་སྟབས་གཙོ་ཆེ་བའི་དབང་གིས་འབྲོག་གླུ་དང༌། དུས་སྟོན་མཛད་སྒོ་སོགས་ཀྱི་སྐབས་མ་གཏོགས་ཁྱིམ་ནང་གླུ་དེ་ཙམ་ལེན་སྲོལ་མེད་ཅིང༌། རི་ལ་སླེབས་པ་ནས་གླུ་ལེན་པ་ནི་རྒྱུན་ལྡན་ལྟར་གྱུར་པ་དང༌། ལྷག་པར་རི་མགོ་ལ་མགོ་ཇི་ཙམ་མཐོ་བར་སླེབས་པ་དེ་ཙམ་གྱིས་ཀི་འདེབས་པ་དང་གླུ་ལེན་པ་སོགས་བྱེད་སྲོལ་ཡོད་པས་ན་ལ་གླུ་དང༌། གླིང་བུ་སོགས་རོལ་ཆ་ལས་བྱུང་བ་མ་ཡིན་པར་དཔྱིད་ཀྱི་རྒྱལ་མོ་སྟེ་ཁུ་བྱུག་གི་སྐད་ལྟར་གྲེ་བའི་སྦུག་ནས་ཐོན་པས་ན་དཔེར་བྱས་པ་དཔེ་ཅན་གྱི་མིང་དུ་གྱུར་པ་དཔྱིད་གླུ་ཟེར། 
      མི་འགའ་ཞིག་ནས་གླུ་ལེན་མཁན་དེ་ནི་སྣང་བ་སྐྱིད་པོ་ཞིག་ཡིན་པར་ངོས་འཛིན་བྱེད། འོན་ཀྱང་མཐའ་གཅིག་ཏུ་གླུ་ལེན་ཚད་སྣང་བ་སྐྱིད་པོ་ཡིན་པའི་ངེས་པ་གང་ཡང་མེད། གླུ་ནི་བདེ་སྡུག་བར་མ་གསུམ་ཀའི་གནས་སྐབས་སུ་ལེན་པ་ཡིན་ཅིང༌། གཙོ་བོ་ནི་སེམས་ལ་ཚོར་བ་གང་ཞིག་ཤུགས་དྲག་འབྱུང་བའི་གནས་སྐབས་སུ་བརྗོད་འདོད་ཀྱི་དོན་རྣམས་ཁ་ནས་ཤུགས་མ་ཐུབ་ཀྱིས་གདངས་ཀྱི་རྣམ་པའི་ཐོག་ལུད་ཡོང་བ་དང༌། ཇི་ཙམ་གྱིས་ཚོར་ཤུགས་ཇེ་ཆེར་གྱུར་པ་དེ་ཙམ་གྱིས་གདངས་དབྱངས་ཀྱི་གཟེངས་ཀྱང་ཇེ་མཐོར་གྱུར་ཏེ་གླུ་ཟེར་བ་འདི་བྱུང་བ་ཡིན། དེས་ན་ཤིན་ཏུ་དགའ་བའི་གནས་སྐབས་སུ་རང་དབང་མེད་པར་ཧཧ་ཧཧ་ཞེས་དགོད་པའི་སྒྲ་དང༌། རབ་ཏུ་སྡུག་བསྔལ་བའི་གནས་སྐབས་སུ་རང་དབང་མེད་པར་ཧུན་ཧུན་ཞེས་ངུ་བའི་གདངས་གཉིས་ནི་བྲོ་གླུ་གཞས་གསུམ་གྱི་ཕ་མ་ཡིན་ཞེས་བརྗོད་ཆོག་སྙམ། གང་ལྟར་དགའ་ན་ཇ་ཆང་མཚར་གླུ་དང་སྡུག་ན་རང་སེམས་གསོ་གླུ་ཟེར་བ་ནི་དོན་དངོས་ཀྱི་གནས་ཚུལ་ཤིག་རེད། 
      གླུ་ནི་ཐག་ཁྲ་དང་མཚུངས་པའི་བདེ་སྡུག་སྤེལ་མའི་དམངས་ཁྲོད་ཀྱི་འཚོ་བ་མཚོན་པའི་སྒྱུ་རྩལ་རྨད་དུ་བྱུང་བ་ཞིག་ཡིན་ལ། ཆུ་ཡི་གཉེར་མ་ལྟར་གཅིག་རྗེས་གཅིག་གིས་མཐུད་པའི་དུས་རབས་ཀྱི་འཕོ་འགྱུར་རྟོགས་ཐུབ་པའི་ཐབས་ཚུལ་བླ་ན་མེད་པ་ཞིག་ཀྱང་ཡིན། གླུ་ཡི་བརྗོད་བྱ་ལ་ཆབ་སྲིད་དང་རིག་གནས་ཀྱི་དོན་སྙིང་ཡོད་པ་མ་ཟད་དམག་དོན་གྱི་གོ་དོན་ཡང་ཡོད། གང་ལྟར་གླུ་ཡི་གོ་དོན་ལ་བཤད་ཀྱང་རྫོགས་མཐའ་མེད་པའི་ཁོར་ཡུག་ཆེན་པོ་ཞིག་ཡོད་པ་ལས། འདིར་བཀོད་པའི་གླུ་རྣམས་ནི་གཙོ་བོར་གཞོན་ནུ་ཕོ་མོ་གཉིས་དང་པོ་ཕན་ཚུན་ཐུག་ཕྲད་བྱུང་བ་ནས་བརྒྱུད་རིམ་མང་པོ་ཞིག་གི་མཐར་ལུས་སེམས་གཅིག་ཏུ་འདྲེས་ཏེ་བདེ་སྐྱིད་ཀྱི་འཚོ་བ་ལ་ལོངས་སྤྱོད་རྒྱུ་བྱུང་བའམ། ཡང་ན་འཆམ་མཐུན་མ་བྱུང་བར་ཁ་འཐོར་དུ་སོང་བའི་བར་གྱི་མངར་སྐྱུར་འདྲེས་མའི་འཚོ་བ་དང་འབྲེལ་ཞིང༌། འཚོ་བ་དེ་དག་རང་ཐོག་ཏུ་མྱོང་བ་ཞིག་མེད་ཀྱང་མིག་གི་ལྟད་མོར་བྱེད་པའི་གང་ཟག་གསུམ་པ་ཞིག་གིས་དེ་དག་ལ་འཛིན་པའི་ལྟ་ཚུལ་བཅས་གསུམ་འབྱུང་བ་དང་སྦྱར་ནས་གོ་བ་བླངས་ན། དམངས་ཁྲོད་ཀྱི་གླུ་གཞས་དེ་དག་གི་བྲོ་བ་སྤྱི་ཚོགས་ཀྱི་འཚོ་བ་དངོས་དང་འདྲེས་པའི་ཚོར་སྣང་ཞིག་འབྱུང་ཐུབ། གང་ཡིན་ཟེར་ན། སྤྱི་ཚོགས་ཀྱི་འཚོ་བ་ཡོངས་སུ་རྫོགས་པ་ཚུར་བསྡུས་ན་ཕོ་མོ་གཉིས་ཀྱིས་ཁྱིམ་ཚང་ཞིག་འཛུགས་པའི་བརྒྱུད་རིམ་ནང་འདུས་ཡོད་པས་རེད། 
      ལར་ནས་མི་སུ་འདྲ་ཞིག་ཡིན་ཀྱང་རང་ཉིད་ཉམ་ཉེས་བྱུང་སྐབས་གཞན་གྱི་བྱམས་སྐྱོང་དང་རོགས་རམ་འཐོབ་དགོས་པར་བརྟེན། རི་རྩེ་དང་བྲག་ཕུག་ནགས་ཁྲོད་དུ་འཐོར་ནས་མ་བསྡད་པར་རིམ་པས་ཕྱོགས་གཅིག་ཏུ་འདུས་སྡོད་བྱས་པ་ལས་མི་ཡི་སྤྱི་ཚོགས་འདི་གྲུབ་ཅིང༌། ཁག་ཅིག་ནས་ཅིའི་ཕྱིར་མི་རྣམས་ཕྱོགས་གཅིག་ཏུ་འདུས་སྡོད་བྱེད་དགོས་པའི་ཐོག་མའི་བསམ་འདུན་དང་མཐུན་པ་ཕན་ཚུན་བྱམས་སྐྱོང་དང་རོགས་རམ་བྱེད་པ་དང༌། ཁག་ཅིག་ནས་ཐོག་མའི་བསམ་འདུན་ལས་ཡོངས་སུ་ལྡོག་སྟེ་སྤྱི་ཚོགས་ནང་ཕུང་དཀྲུག་དང་གཞན་གནོད་ཁོ་ན་བྱེད་བཞིན་གནས་ཡོད། གང་ལྟར་མི་མང་པོ་ཕྱོགས་གཅིག་ཏུ་འདུས་སྡོད་བྱེད་པའི་སྤྱི་ཚོགས་འདི་གྲུབ་ནས་གྲོགས་པོ་ཕན་ཚུན་བར་བློ་གྲོས་སྤེལ་རེས་དང༌། ཁ་གཏད་ཕན་ཚུན་བར་འགྲན་བསྡུར་གྱི་ཐོག་ནས་རྣམ་དཔྱོད་ཀྱི་ནུས་པ་གོང་མཐོར་ཕྱིན་ཏེ་ཚ་ཚ་འུར་འུར་གྱིས་འཛམ་གླིང་འདིར་སྔར་མེད་ཀྱི་དངོས་པོ་མང་པོ་ཞིག་བཟོ་ཤེས་སྤྱོད་ཤེས་སུ་གྱུར་པ་ནས། ཆབ་དཔལ་རིག་གསུམ་གྱི་རྣམ་གཞག་མང་པོ་ཞིག་སྤང་ལ་ཤ་མོང་རྡོལ་བ་ལྟར་བྱུང༌། 
      རྣམ་གཞག་དེ་དག་གི་ཁྲོད་དུ་དུས་སྟོན་དང་མཛད་སྒོ་རྗེས་དྲན་སོགས་མི་མང་རུབ་འཛོམས་བྱེད་པའི་གོ་སྐབས་མང་པོ་ཞིག་ཀྱང་ཤུགས་མ་ཐུབ་ཀྱིས་བྱུང་ཞིང༌། རུབ་འཛོམས་དུས་སྐབས་དེ་ནི་མི་རྣམས་ཕན་ཚུན་ཐུག་ཕྲད་དང་ངོ་ཤེས་གྲོགས་སྒྲིག་བྱེད་པའི་གོ་སྐབས་ཡག་ཤོས་ཞིག་ཡིན། འོན་ཀྱང་སྤྱིར་བཏང་གི་མི་གཉིས་ཐུག་ཕྲད་བྱུང་བ་ཡིན་ཀྱང་དམིགས་བསལ་གྱི་ཚོར་སྣང་དེ་འདྲ་གང་ཡང་མེད། གལ་ཏེ་ལས་འཕྲོའི་མདུད་པ་ཐེབས་པའི་གཞོན་ནུ་ཕོ་མོ་གཉིས་ཕན་ཚུན་མཐོང་བ་ཡིན་ན། སེམས་ལ་སྤྲིན་ཁ་འཐབ་པའམ་ལུས་ལ་ཟ་ཕྲུག་ལངས་པའམ་ཁ་ཡི་སོ་རྩ་རྩད་པའམ་གང་ལྟར་བཤད་མི་ཤེས་པའི་ཚོར་སྣང་འབྱུང་ཞིང༌། དང་ཐོག་མ་ཐུག་པའི་གནས་སྐབས་སུ་ཕན་ཚུན་ཐུག་ན་སྙམ་པ་དང་ཐུག་པའི་གནས་སྐབས་སུ་མགྱོགས་ཙམ་གཡོལ་ཐུབ་ན་སྙམ་པ་འབྱུང་སྲིད། གང་ལྟར་དང་པོ་ལན་གཅིག་ཐུག་པར་འདོད་པ་ནས་བར་དུ་མང་དུ་ཕྲད་ན་སྙམ་པ་དང་མཐར་འབྲལ་དཀའ་བའི་རྣམ་པ་འབྱུང་ཞིང༌། འདིར་བཀོད་པའི་གླུ་མང་ཆེ་བ་ནི་དེ་དག་གི་ཚུལ་ལས་བརྩམས་ཏེ་བླངས་པ་ཞིག་རེད། 
      བྲོ་གླུ་དེ་དག་གི་ཡུལ་ལ་ཨ་སྔོན་མཐོན་པོ་དང་གངས་སྟོད་མཐོན་པོ། དེ་བཞིན་རྫ་རི་དང་ནགས་རི། བླ་མ་དང་དཔོན་ལུ། ཕ་ཁུ་དང་མ་སྲུ། རྟ་གཡག་ལུག་སོགས་ལྟ་བུ་ཞེ་ཅིག་ལས་མི་འདུག་སྙམ་པ་སྲིད་མོད། རྒྱ་གར་ཤར་ལྷོའི་སྙན་ངག་མཁས་པ་དེ་ཚོའི་སྙན་ངག་གི་ཡུལ་ལ་ཡང་གནམ་གྱི་ཉི་མ་དང་ཟླ་བ། ས་ཡི་པདྨ་དང་ཀུ་མུད། རི་ལ་འབིག་བྱེད་དང་ཀཻ་ལ་ཤཱ། ལྷ་ལ་དབང་ཕྱུག་དང་ཁྱབ་འཇུག ཆུ་ལ་གངྒཱ་དང་སིའ་ཏཱ་སོགས་མཛུབ་མོས་བགྲང་ན་ཉུང་ཤས་ཤིག་ཡིན། དཔེར་ན་རི་བོའི་སྐོར་གཅིག་པུར་མཚོན་ན། གངས་རི་དང་ནགས་རི་གཉིས་ནི་རྒྱ་བོད་ཐུན་མོང་བ་ཡིན་ཀྱང༌། རྫ་བྲག་གཡའ་གསུམ་སྤང་རི་དང་བཅས་ལ་སྦྱར་ནས་བཤད་པ་ནི་བོད་ཁོ་ནའི་ཁྱད་ཆོས་ཤིག་ཡིན་པས། དེའི་ཆ་ནས་ཀྱང་བོད་དམངས་ཁྲོད་ཀྱི་བྲོ་དང་གླུ་ཡི་ཡུལ་ལ་རྒྱ་གར་ལས་ཀྱང་ཐ་སྙད་ཕུན་སུམ་ཚོགས་ཆེ་བར་ཡོད་ཅེས་བརྗོད་ཆོག་སྙམ།