ཐང་སྟོང་ལྕགས་ཟམ།
དྲ་ཚིགས་དོ་དམ་པས།
འབྱུང་ཁུངས། སྤེལ་མཁན། སྤེལ་དུས།2016-10-22

ངོ་སྤྲོད་མདོར་བསྡུས།

      ཐང་སྟོང་ལྕགས་ཟམ་ནི་སི་ཁྲོན་ཞིང་ཆེན་དཀར་མཛེས་བོད་རིགས་རང་སྐྱོང་ཁུལ་གྱི་ལྟེ་བ་དར་རྩེ་མདོའི་ཤར་ཕྱོགས་ལྕགས་ཟམ་རྫོང་དུ་བཞུར་བའི་རྒྱལ་མོ་རྔུལ་ཆུའི་སྟེང་དུ་བཙུགས་ཡོད། ཟམ་པ་བཞེང་མཁན་ནི་བོད་ཀྱི་གྲུབ་ཆེན་ཐང་སྟོང་རྒྱལ་བོ་ཉིད་ཡིན་པས་བོད་ཀྱི་གནའ་ཤུལ་གྲགས་ཅན་གྱི་གྲས་སུ་བགྲང་ཆོག ཟམ་པ་འདི་ནི་གྲུབ་ཐོབ་ཉིད་ཀྱིས་འབངས་ཀྱི་ཆེད་དུ་ལྕགས་ཟམ་ལྔ་བཅུ་ང་བརྒྱད་བཙུགས་པའི་ནང་གི་གཅིག་ཡིན། ཡུལ་དེའི་དེབ་ཐེར་དང་ཡུལ་མིའི་ངག་སྒྲོས་སུའང་བོད་ཀྱི་བླ་མ་ཞིག་གིས་ལས་དཔོན་བྱས་ནས་བཞེངས་པའི་ངག་རྒྱུན་འདུག ལྕགས་ཟམ་འདི་ནི་བྱིས་པ་ལོ་བརྒྱད་ཅན་གྱི་དཔུང་བའི་སྦོམ་ཕྲ་ཙམ་གྱི་ལྕགས་ཐག་བཅུ་གསུམ་ལས་བསྐྲུན་པའི་ཟམ་ཆེན་ཞིག་ཡིན་པས། འདི་ལ་ལོ་ངོ་ལྔ་བརྒྱ་ཙམ་གྱིས་ལོ་རྒྱུས་ཡོད། དེ་ནི་དུས་སྐབས་ཤིག་གི་བོད་ཀྱི་ལག་ཤེས་བཟོ་ལས་ལ་རྟོག་ཞིབ་བྱ་བར་དཔྱད་གཞིར་འོས་པའི་གནའ་ཤུལ་གྱི་རིག་དངོས་རྩ་ཆེན་ཞིག་རེད། ད་སྐབས་ཟམ་པ་འདི་ནི་རྒྱལ་ཁབ་རིམ་པའི་རིག་དངོས་བདག་སྐྱོང་བྱ་ཡུལ་དུ་གྱུར་ཡོད།



མི་ཉག་ལྕགས་ཟམ།
      དར་མདོ་གྲོང་གི་ནུབ་རྒྱུད་ནས་སྤྱི་ལེ་བརྒྱ་ལྷག་ཙམ་གྱིས་རྒྱང་བའི་སར་ལྕགས་ཐག་གི་དཔྱང་ཟམ་ཞིག་བཙུགས་ཡོད་ཅིང་། དེ་ནི་མི་ཉག་གླིང་ཆུ་ཁྲ་མོ་ཞེས་པའི་ཆུ་བོའི་ཐོག་ལ་བཙུགས་ཡོད་པ་རེད། མི་རྣམས་ཀྱིས་དཔྱང་ཟམ་དེར་མི་ཉག་ལྕགས་ཟམ་ཞེས་པ་དང་ས་གནས་དེའི་ཕྱོགས་སུ་ཆགས་པའི་གྲོང་སྡེ་ལ་ལྕགས་ཟམ་ཁ་ཞེས་འབོད་ཀྱི་ཡོད་པ་རེད། ས་གནས་དེ་གའི་རྒན་རབས་པ་ཚོས་བཤད་པ་ལྟར་ན། ལྕགས་ཟམ་དེ་ནི་དུས་རབས་བཅོ་ལྔ་བའི་ཡས་མས་སུ་གྲུབ་ཐོབ་ཀྱི་སྙན་གྲགས་ཀུན་ཏུ་ཁྱབ་པའི་དྲིན་ཅན་ཐང་སྟོང་རྒྱལ་བོས་ས་གནས་དེ་ཕྱོགས་ཀྱི་ཆུ་ངོགས་གཉིས་ཀྱི་མི་རྣམས་ཕན་ཚུན་འགྲོ་འོང་བྱེད་པར་དཀའ་བའི་རྣམ་པ་སེལ་ཕྱིར་ལྕགས་ཐག་དཔྱང་བའི་ཟམ་པ་འདི་བཙུགས་པར་གྲགས། དེ་ལྟར་དུ་རྩིས་ན་ལྕགས་ཟམ་དེ་བཙུགས་ནས་ཧ་ལམ་ལོ་ལྔ་བརྒྱ་ཙམ་འདས། དེའི་དུས་སུ་ད་དུང་སྔོན་ཐོན་གྱི་ཚ་ལ་རྒྱག་སྟངས་ཀྱི་ལག་རྩལ་དར་སྤེལ་བྱུང་མེད་ཀྱང་ལྕགས་ཟམ་དེའི་ལྕགས་ལུང་སོ་སོར་བརྒྱབས་པའི་ཚ་ལ་ནི་དེང་སང་ཡང་སྐྱོན་སྤུ་ཙམ་ཤོར་མི་འདུག ད་དུང་ཡ་མཚན་ཆེ་བ་ཞིག་ནི་ལྕགས་ཟམ་བཙུགས་ནས་ལོ་ཟླ་ཧ་ཅང་མང་བོ་བརྒྱུད་རུང་དེའི་ལྕགས་ཡོངས་རྫོགས་ལ་བཙའ་ཐིག་གི་སྐྱོན་རིག་རྒྱུ་མི་འདུག་པ་མ་ཟད་སྣུམ་དབྱུག་པ་འདྲ་བའི་རྣམ་པ་མངོན་བཞིན་མཆིས། ལྕགས་ཟམ་དེའི་མཐོ་ཚད་ཧ་ལམ་སྨི ༩ ཙམ་ཡོད་པ་ཞིག་རེད། ས་གནས་དེ་གའི་ངག་རྒྱུན་དུ་བརྗོད་པར་གཞིགས་ན། མི་ཉག་གླིང་ཆུ་ཁྲ་མོ་ཆེན་པོར་གྱུར་ནས་ལྕགས་ཟམ་དེ་ཁེབས་སོང་ན་ཆུ་རྒྱུད་དེའི་ལུང་ཁུག་ཏུ་ཆགས་པའི་གྲོང་སྡེ་རྣམས་ལ་ཆུའི་གནོད་སྐྱོན་ཐེབས་ཉེན་ཡོད་ཅེས་དྲིན་ཅན་ཐང་སྟོང་རྒྱལ་བོས་ཞལ་ཆེམས་བཞག་མྱོང་བ་རེད། ༡༩༩༥ ལོའི་དབྱར་གཞུང་དུ་མི་ཉག་གླིང་ཆུ་ཁྲ་མོའི་སྟོད་རྒྱུད་དུ་ཆར་ཆུ་འབེལ་བའི་རྐྱེན་གྱིས་ལྕགས་ཟམ་ཁེབས་ཉེར་ཡོད་པའི་གནས་སུ་བསླེབས། དུས་དེར་མིའི་ཚེ་སྲོག་ཤོར་མེད་ཀྱང་ཆུ་རྒྱུད་ཉེ་འགྲམ་དུ་ཡོད་པའི་རྨོས་ཞིང་དང་སྡོད་ཁང་རྣམས་ཆུའི་གནོད་འཚེ་ཐེབས་མྱོང་བ་རེད། དེར་བརྟེན་ཐང་སྟོང་རྒྱལ་བོའི་ཞལ་ཆེམས་དེ་ནི་རིག་པས་དཔྱད་པའི་ཁུངས་ལུང་དག་མ་རེད་ཅེས་ས་གནས་དེ་གའི་མི་རྣམས་ཀྱིས་བཤད་བཞིན་འདུག ལྕགས་ཟམ་དེའི་ཟམ་སྟེགས་ནི་རྡོ་ཕུང་ཤ་སྟག་ལས་བརྩིགས་པ་ཞིག་རེད། ཧ་ལམ་ལོ་ལྔ་བརྒྱ་ཙམ་བརྒྱུད་ཀྱང་ད་དུང་འགུལ་སྐྱོན་ཐེབས་མེད་པར་དཔག་ན་ཟམ་སྟེགས་ཀྱི་ཟབ་ཚད་དང་ལས་སྟངས་ཀྱི་སྤུས་ཀ་ཡག་པོ་ཡིན་པ་ཤུགས་བསྟན་དུ་མངོན། དེའི་རིང་ཚད་སྨི ༢༦ ཙམ་ཡོད་པ་དང་ལྕགས་ཐག་བཞི་དཔྱང་བའི་ཐོག་ཤིང་ལེབ་བཏིང་ནས་མི་འགྲོ་འོང་ཐུབ་པ་བྱེད་པ་ཞིག་རེད། ལྕགས་ཟམ་དེའི་ཉེ་འགྲམ་དུ་ཐང་སྟོང་རྒྱལ་བོས་ལྕགས་ཟམ་འཛུགས་དུས་ལྕགས་མགར་སའི་མགར་ཁང་རེད་ཅེས་པའི་ཁང་མིག་ཅིག་གི་རྗེས་ཤུལ་འདུག དེའི་རྩར་ཐོ་སྟེགས་དང་། ཐོ་བ། སྐམ་པ་སོགས་མགར་བྱ་སའི་ཡོ་བྱད་ཁག་ཅིག་མཇལ་རྒྱུ་འདུག ལོ་རྟག་པར་དབྱར་གཞུང་དུ་ཆུ་ངོགས་གཉིས་ཀྱི་མི་རྣམས་ལྕགས་ཟམ་ཁར་འདུ་འཛོམས་བྱས་ནས་རྩེད་མོ་སྣ་ཚོགས་རྩེས་ནས་དྲིན་ཅན་ཐང་སྟོང་རྒྱལ་བོས་ལྕགས་ཟམ་བཙུགས་པར་དྲན་གསོ་བྱེད་ཀྱིན་ཡོད་པ་རེད།༼བོད་ཀྱི་སློབ་འབྲིང་དྲ་བ་ལས་བཏུས།༽
 
ཐང་སྟོང་རྒྱལ་བོ་དང་མི་ཉག་ལྕགས་ཟམ།
        ༼དཔལ་གྲུབ་པའི་དབང་ཕྱུག་བརྩོན་འགྲུས་བཟང་བོའི་རྣམ་ཐར་ཀུན་གསལ་ནོར་བུའི་མེ་ལོང༽ཞེས་པའི་བོད་ཀྱི་ལོ་རྒྱུས་ཡིག་ཚགས་ནང་བཀོད་པར་གཞིགས་ན། སྙན་པའི་གྲགས་པ་ནོར་འཛིན་གཞི་མོའི་ཁྱོན་ཀུན་ཏུ་བོད་ཀྱི་ཕུལ་དུ་བྱུང་བའི་བཟོ་སྐྲུན་འཆར་འགོད་པ་དྲིན་ཅན་ཐང་སྟོང་རྒྱལ་བོ་རྒྱ་ནག་རི་བོ་རྩེ་ལྔར་བྱོན་ནས་མི་ཉག་དར་རྩེ་མདོར་འབྱོན་འཕྲོ། གྲྭ་བ་འཁོར་རྟ་དྲེའུ་དང་བཅས་པ་དར་རྩེ་མདོར་བཞག གྲུབ་ཐོབ་ཐང་སྟོང་རྒྱལ་བོ་གཅིག་པུ་རྒྱ་ནག་རི་བོ་རྩེ་ལྔར་ཕེབས། རྒྱ་ནག་ལ་དུས་ཚོད་རིང་ཐུང་ཅི་འདྲ་བཞུགས་པ་སོགས་ཕྲན་ཆུང་བདག་གིས་མཇལ་བའི་ལོ་རྒྱུས་ཡིག་རིགས་མ་མཐོང་། དེའི་ཐད་རྒྱ་ཆེ་བའི་ཀུན་མཁྱེན་རྣམ་པས་ཞིབ་འཇུག་དང་ཁུངས་ལུང་འཚོལ་བར་འཚལ། དེ་ནས་རྒྱ་ནག་རི་བོ་རྩེ་ལྔ་ནས་གྲུབ་ཐོབ་ཆེན་པོ་སླར་ཡང་དར་མདོར་ཕེབས། དར་རྩེ་མདོ་ནས་གྲྭ་བ་འཁོར་རྙིང་བ་རྣམས་དང་ཁམས་པ་ཕྱགས་ཕྱིར་འབྲངས་པ་མང་བོས་རྟ་དྲེའུ་མཛོ་གཡག་སོགས་ལ་ཁལ་གང་ཐེག་བཀལ། མ་ཐེག་པ་རྣམས་རིམ་གྱི་དང་བླངས་སྟོབས་ཅན་ལ་བསྐུལ་ནས་མི་ཉག་གི་ཡུལ་མཁར་གླིང་དུ་ཕེབས། མི་ཉག་ཡུལ་གྲུ་ཀུན་གྱི་མི་ཚོས་གྲུབ་ཐོབ་ཆེན་པོ་ལྕགས་ཟམ་པ་ཕེབས་བྱུང་ཟེར་ནས་མདའ་རྩེ་དང་རྩེད་མོ་སྣ་ཚོགས་བྱེད་ཅིང་། ཇ་ཆང་ལོངས་སྤྱོད་བསམ་གྱིས་མི་ཁྱབ་པ། ཚོགས་འཁོར་རྒྱ་ཆེན་པོ་དང་ཆོས་འབྲེལ་ཞུས། མི་ཞིག་གིས་རལ་གྲི་ཞིག་ཕུལ། མི་ཉག་ཡུལ་མཁར་གླིང་དུ་བཞུགས་པའི་སྐབས་སུ་མི་ཉག་ཡུལ་སྡེ་ཆེ་བས་རྒྱུན་དུ་འཐབ་རྩོད་བྱུང་ཞིང་དམེ་འཁྲུགས་མང་བོ་ཡོད་པ་ཞི་འཇགས་སུ་བཏང་། ཕོ་མོ་མང་དུ་ཚོགས་བྱུང་བར་ཆོས་འབྲེལ་མཛད། རྟ་དྲེའུ་གསེར་དངུལ་གོས་དར་སོགས་འབུལ་བ་མཐའ་ཡས་པ་བྱུང་། ཐང་སྟོང་རྒྱལ་བོས་མི་ཉག་གླིང་ཆུ་ཁྲ་མོ་ཡིས་འཇིག་རྟེན་གྱི་མི་རྣམས་ལ་བརྒལ་དཀའ་བའི་འཇིགས་སྣང་རྒྱུན་དུ་སྟེར་བ་མཁྱེན་ནས་མི་སེར་དག་གིས་འབུལ་བའི་རྒྱུ་ནོར་མཐའ་དག་གིས་ངར་ལྕགས་ཤ་སྟག་ཉོས་ནས་ལྕགས་ཐག་བཞི་ཅན་དཔྱང་བའི་ལྕགས་ཟམ་ཞིག་བཙུགས་པ་རེད། ལྕགས་ཟམ་དེ་ད་ལྟར་དར་མདོ་རྫོང་འགག་པ་ཤང་གི་མངའ་ཁོངས་སུ་ཡོད། ༼ཡོང་ཁུངས། བོད་ཀྱི་སློབ་འབྲིང་དྲ་བ།༽
 
བོད་དུ་ལྕགས་ཟམ་བཟོ་སྐྲུན་དར་བ།
      བོད་ཀྱི་ཡུལ་འདིར་གཏེར་རྡོ་བཞུས་ནས་གསེར་དངུལ་ཟངས་ལྕགས་རྣམས་བཏོན་པའི་ལག་རྩལ་དེ་ད་ཕན་ལོ་ངོ་ཉིས་སྟོང་ལྷག་གི་ལོ་རྒྱུས་དང་ལྡན་པ་ཁུངས་ལྡན་གྱི་ཡིག་ཆ་རྣམས་སུ་གསལ་བ་ལྟར་དང་། ལྕགས་ཟམ་བཟོ་སྐྲུན་བྱེད་པའི་ལག་རྩལ་གྱི་ལོ་རྒྱུས་ཆེས་སྔ་བ་ནི་དུས་རབས་བདུན་པའི་ནང་རྒྱལ་བོ་སྲོང་བཙན་སྒམ་པོས་ཕོ་བྲང་བཞེངས་པའི་སྐབས་སུ། རྒྱལ་བོའི་སྐུ་མཁར་དང་བཙུན་མོའི་སྐུ་མཁར་བར་ལྕགས་ཟམ་གྱིས་སྦྲེལ་ཏེ། དེའི་འོག་ན་དར་དང་། རྔ་ཡབ་དང་། དྲིལ་བུ་གཡེར་ཁའི་སྒྲ་འཁྲོལ་བ། རྒྱལ་བོ་ཡབ་ཡུམ་ཕན་ཚུན་གཤེགས་པ་སོགས་ཀྱི་སྐོར། ༼རྒྱལ་རབས་གསལ་མེ༽ སོགས་སུ་གསལ། གཞན་ཡང་དུས་རབས་འདིའི་ནང་དུ་བོད་ཀྱི་འབྲི་ཆུ་ལ་ལྕགས་ཟམ་བཙུགས་པ་དང་། ཡངས་པའི་གཙང་བོ་ལ་ལྕགས་ཟམ་བཙུགས་པ་བཅས་ཀྱི་ལོ་རྒྱུས་ནི། རྒྱལ་ཐང་ཤེས་རབ་རྒྱ་མཚོས་བྲིས་པའི༼གནའ་རབས་བོད་ཀྱི་ཡུན་ནན་ས་ཁུལ་དུ་ལྕགས་ཟམ་བཙུགས་པའི་སྐོར་གླེང་བ༽ཞེས་པའི་མཐའ་དཔྱོད་དེའི་ནང་དོན་རྣམས་མདོར་བསྡུས་སུ་བཀོད་ཡོད་པ།༼ ཡོང་ཁུངས། མཚོ་སྔོན་པོའི་ཟིན་བྲིས།༽ 

ཐང་སྟོང་རྒྱལ་བོའི་ཟམ་པ་བཞེང་ཚུལ།
      རྗེས་སུ་ཐང་སྟོང་རྒྱལ་བོ་མཆོག་གནས་ཡུལ་ངེས་མེད་དུ་རྒྱུ་བའི་རྣལ་འབྱོར་པ་ཞིག་ཏུ་གྱུར། དབུས་སུ་ཇོ་བོ་རིན་པོ་ཆེ་མཇལ་བར་བྱོན་དུས་ལྷ་སའི་སྐྱིད་ཆུའི་གྲུ་ལ་ཞུགས་སྐབས་གཉན་པ་གཞན་ལ་ཚིག་པ་ཟོས་ཏེ་ཁྱོད་ང་ལ་མ་དྲིས་པར་གྲུ་ལ་བཞུགས་པ་མི་འོས་ཞེས་གྲུ་དཔོན་གྱིས་ཚིག་རྩུབ་སྨྲས་ཤིང་། དབུ་ལ་ཤན་སྐྱ་གཞུས་པ་དང་ཆུ་ལ་བསྐྱུར་བས་ཐུགས་ཤིན་ཏུ་ཕམ་པ་ཞིག་བྱུང་། དེས་སྐུལ་རྐྱེན་གྱིས་ཉམ་ཐག་གི་སྐྱེ་བོ་ཇི་སྙེད་ཀྱང་དཀའ་སྡུག་དེ་འདྲ་མྱོང་དགོས་འདུག་དགོངས་ཤིང་ཨུ་རྒྱན་གྱི་སློབ་དཔོན་ཆེན་པོ་སོགས་བླ་མ་ཡི་དམ་མཁའ་འགྲོ་མང་བོས་ཡང་ཡང་བསྐུལ་བ་ལྟར་ཆུ་བོ་རྣམས་ལ་ལྕགས་ཟམ་འཛུགས་རྒྱུའི་དམ་བཅས། ཐོག་མར་རྣལ་འབྱོར་པ་སྔ་རིས་པ་སོགས་དད་འདུས་ཀྱི་སློབ་མ་ལྔ་བཅུ་ཙམ་ཁྲིད་དེ་སྔ་རྗེས་སུ་ཀོང་ཡུལ་སྟེང་རྩ་དང་། བྷ་ཁ། སྨན་མོ་སྒང་སོགས་སུ་ཕེབས་ནས་ལྕགས་ཀྱི་སློང་མོ་མཛད་པ་དང་དུས་མཚུངས་རང་ཉིད་འཁོར་བཅས་ཀྱང་ལྕགས་ཁ་སྔོགས་འདོན་གྱི་ལས་ཀར་ཞུགས་ནས་ལྕགས་གཏེར་འབོར་ཆེན་བཏོན། གྲུབ་ཐོབ་རང་ཉིད་ཀྱང་ལྕགས་བཟོའི་ལག་གཡོག་མཛད། དབུས་གཙང་ཁམས་གསུམ་དང་མོན་ཡུལ་ལྷོ་འབྲུག་སོགས་ལ་ཕེབས་ནས་ལྕགས་མང་བོ་བསྒྲུབས། དགུང་གྲངས་བདུན་ཅུ་བ་རབ་བྱུང་བདུན་པའི་ལྕགས་ཁྱི༼སྤྱི་ལོ  ༡༤༣༠༽ལོར་ལྷ་སའི་གཙང་བོར་ལྕགས་ཟམ་ཐོག་མ་དེ་བཙུགས། དུས་དེ་ནས་བཟུང་གྲུབ་ཐོབ་ལྕགས་ཟམ་པ་ཞེས་གྲགས། ཐང་སྟོང་རྒྱལ་བོ་མཆོག་གིས་བག་གྲོང་འབྲི་ཆུ་དང་། རྫ་ཆུ། ཉག་ཆུ། ལྷོ་འབྲུག གངས་ལ་ཀློང་ཁ། དཔལ་ཆུ་བོ་རི། བཞང་བཀྲ་ཤིས་རྩེ། གཙང་སྟོད་ཡོངས་རུ། སྟོད་ལུང་། ཉ་འགོ་གྲུ་ཁ། འབྲི་གུང་ཆོས་འཁོར་སྒང་། གཞུ་སྣ། མོན་ཡུལ་འཛོམས་སོགས་ཆུ་ཀློང་ཆེན་པོ་རྣམས་ལ་ལྕགས་ཟམ་ལྔ་བཅུ་ང་བརྒྱད་བསྐྱོན། ཤན་ཆེན་དང་གྲུ་འདྲེས་པ་བརྒྱ་དང་བཅོ་བརྒྱད། ཤིང་ཟམ་དྲུག་ཅུ་ཐམ་པ་བཅས་བཙུགས།
 
ཟམ་སྐྲུན་མཁན་གྱི་དམ་བཅའ།
      ཟམ་སྐྲུན་མཁན་གྱི་དམ་བཅའ། ཉིན་ཞིག་ལ། མི་ཞིག་གིས་ཁལ་བཀལ་བའི་བོང་བུ་དེད་ནས་ཆུ་བོ་རྒལ་གྱིན་ཡོད། ཆུ་བོའི་གཞུང་དུ་སླེབ་ལ་ཉེ་དུས་སུ། ཆུ་ཤུགས་ཆེ་བས་བོང་བུ་ཆུ་ནང་དུ་འགྱེལ་བ་དང་། མི་དེས་མྱུར་དུ་བོང་བུ་ཡར་སློང་སྐབས་ཁོ་ཡང་ཆུ་ནང་དུ་འགྱེལ་ཞིང་། དེའི་མུར་ཆལ་ཆིལ་གྱི་རྦ་རླབས་ཞིག་གིས་མི་ཟོག་གཉིས་ཀ་བཏུམས་ནས་མི་སྣང་བར་གྱུར། ལོ་རེའི་དབྱར་ཁར་ཆར་ཞོད་ཆེན་པོས་ཆུ་བོ་རྒྱས་པའི་དུས་སུ་མི་ཟོག་མང་བོའི་སྲོག་འདི་ལྟར་ཤོར་གྱིན་ཡོད། ཆུ་བོའི་ཚུར་ཁ་ན་བྱིས་པ་ཞིག་གི་དེར་བལྟས་ནས་སྡད་འདུག། བྱིས་པ་དེའི་མིང་ལ་ཁྲོ་བོ་དཔལ་ལྡན་ཟེར། མི་ཟོག་གཉིས་དེ་ལྟར་ཤི་བ་ལ་སྙིང་རྗེ་ཚད་མེད་སྐྱེས་པ་དང་ཡིད་སྐྱོ་ཞིང་སེམས་སྡུག་པའི་ངང་ནས་ཆུ་འགྲམ་དུ་ལངས་ཏེ་ཆུ་བོ་ཆལ་ཆིལ་དུ་རྒྱུག་པ་ལ་བལྟས་ནས་ལོ་མང་བོའི་རིང་ལ་ཆུ་བོ་འདིས་ཅི་འདྲའི་མི་མང་བོའི་སྲོག་འཕྲོག་ཡོད་དམ་སྙམ་ཞིང་མི་རྣམས་བདེ་བླག་ཏུ་ཆུ་ལ་བརྒལ་ཐུབ་པའི་ཆེད་དུ་རང་ཉིད་ནར་སོན་ན་ཆུ་ལ་ཟམ་པ་སྐྲུན་མཁན་ཞིག་བྱེད་རྒྱུའི་དམ་བཅའ་བརྟན་པོ་སྙིང་ལ་བཅངས། རིག་གནས་སྦྱང་བའི་ཆེད་དུ་ཁོང་བྱང་སྡིངས་དགོན་པར་ཞུགས་ནས་གྲྭ་བ་བྱས་ཤིང་མིང་བརྩོན་འགྲུས་བཟང་བོ་ཞེས་བཏགས། ཁོང་གི་དཀའ་སྦྱད་འབད་བརྩོན་གྱིས་རིག་གནས་ཤེས་བྱར་སྦྱང་བ་བྱས་པས་མཁས་པར་གྱུར་པ་དང་མིང་ལ་ཐང་སྟོང་རྒྱལ་བོ་ཞེས་ཐོགས་ནས་ཀུན་ལ་གྲགས་པར་གྱུར། རྗེས་སུ་ཁོང་རིག་གནས་གཞན་སློབ་གཉེར་གྱི་ཆེད་དུ་ལྷ་སར་ཕེབས། ཉིན་ཞིག་ལྷ་གདོང་ཤན་ཁ་ནས་གཙང་བོ་རྒལ་དུས་མི་མང་བོ་གྲུ་གླ་སྤྲོད་རྒྱུ་མེད་པར་ལུས་ཡོད་པ་མཐོང་། ཁོང་སེམས་ཀྱི་མ་བཟོད་པར་གྲུ་དཔོན་ལ་གྲུ་གླ་མི་དགོས་པར་མི་རྣམས་གྲུ་ལ་སྡོད་དུ་འཇུག་རོགས་ཞེས་ཞུ་བ་བྱས་པ་ལ་གྲུ་དཔོན་གྱི་ཁྱོད་རང་གྲུ་གླ་སྤྲོད་རྒྱུ་མེད་པ་ཞིག་གིས་ད་དུང་མི་གཞན་གྱི་ལག་ནས་གྲུ་གླ་མ་ལེན་ཟེར་བ་ཅི་ཡིན་ཟེར་ནས་ཁོང་གི་མགོ་ལ་སྐྱ་བ་བཞུས་ཏེ་ས་ལ་འགྱེལ་བ་རེད། དེ་ནས་ཁོང་གིས་ཉམ་ཐག་གི་མི་བགྲང་ལས་འདས་པ་ཞིག་གིས་འདི་འདྲའི་བརྙས་བཅོས་མྱོང་གིན་འདུག་སྙམ་ནས་སེམས་ཤིན་ཏུ་སྐྱོ་བ་དང་མི་རྣམས་ཀྱིས་གླ་སྤྲོད་མི་དགོས་པར་ཆུ་བོར་བརྒལ་ཐུབ་པའི་ཟམ་པ་འཛུགས་རྒྱུའི་དམ་བཅའ་སྔར་བས་བརྟན་དུ་སོང་། ཁོང་བལ་བོ་དང་རྒྱ་གར་སོགས་ས་ཆ་མང་བོར་སོང་ནས་སྡུག་རུས་ཀྱིས་ཟམ་པའི་བཟོ་བཀོད་དང་སྐྲུན་ཐབས་ལྕགས་བཞུ་བ་དང་ལྕགས་ཐག་རྡུང་བ་སོགས་ཀྱི་ལག་རྩལ་སློབ་སྦྱོང་བྱས། སྤྱི་ལོ ༡༤༣༠ ལོར་ཐང་སྟོང་རྒྱལ་བོ་བརྩོན་འགྲུས་བཟང་བོས་བཟོ་བཀོད་བྱས་པའི་ལྕགས་ཐག་གི་ཟམ་པ་དང་བོ་དེ་སྐྱིད་ཆུའི་ལྷ་གདོང་ཤན་ཁར་བཙུགས་པ་རེད། དེའི་རྗེས་སུ་ཁོང་གི་བོད་ཡུལ་གྱི་ཆུ་ཆེན་ཡར་ཀླུང་གཙང་བོ་དང་འབྲི་ཆུ་རྫ་ཆུ་ཉང་ཆུ་ལ་སོགས་དྲག་ཏུ་འབབ་པའི་ཆུ་བུའི་ཐོག་ཏུ་ལྕག་ཐག་གི་ཟམ་པ ༥༨ ཤིང་ཟམ ༦༠ ལ་སོགས་པ་བསྐྲུན་ཏེ་རང་ཉིད་ཀྱི་ཆུང་དུས་དམ་བཅའ་མངོན་གྱུར་བྱས་པ་རེད། ༼བོད་ཀྱི་སློབ་འབྲིང་དྲ་བ་ལས་བཤུས།༽
 
ལྕགས་ཟམ་དང་འབྲེལ་ཡོད།
      ཐང་སྟོང་རྒྱལ་བོ་ནི་གནས་མཆོག་ཀུན་ཏུ་རྒྱུ་བའི་རྣལ་འབྱོར་པ་ཞིག་ཀྱང་ཡིན་པས་ཐེངས་གཅིག་ཚལ་གུང་ཐང་ནས་ལྷ་སར་འབྱོན་པའི་ལམ་བར་ལྷ་གདོང་ཤན་པར་གྲུ་དཔོན་ལ་གླ་རྔན་གནང་རྒྱུ་མ་བྱུང་བས་ལ་ཁར་ཇག་པ་དང་ཆུ་ཁར་མཉན་དཔོན་གྱི་དཔེ་ལྟར་གྲུ་དཔོན་གྱིས་ཁོང་གི་དབུ་ལ་ཤན་སྐྱ་ལན་གསུམ་གཞུས་ཏེ་ཆུ་ནང་དུ་བསྐྱུར་བས་ཐུགས་ཡིད་ཤིན་ཏུ་ཕམ་པ་ཞིག་བྱུང་བ་མ་ཟད། ཉམ་ཐག་གི་སྐྱེ་བོ་བགྲང་ལས་འདས་པ་ཞིག་ཀྱང་འདི་དང་འདི་འདྲའི་བརྙས་བཅོས་དང་དཀའ་སྡུག་མྱོང་དགོས་པ་ཤུགས་ཀྱིས་མཁྱེན་ནས་སླར་ཐུགས་ཀྱིས་མ་བཟོད་པར་ཆུ་ཀླུང་བརྒལ་མི་བཏུབ་པ་རྣམས་ལ་ལྕགས་ཀྱི་ཟམ་པ་འཛུགས་རྒྱུའི་མི་ཕྱེད་པའི་དམ་བཅའ་ཐུགས་ལ་བཀོད། དེ་ནས་འབངས་དུ་མས་བཙལ་བའི་གསེར་ཞོ་བརྒྱ་ཐམ་པ་ཕྱག་རྫས་སུ་བསྣམས་ཏེ་ཀོང་བོར་ལྕགས་འཚོལ་བར་ཕེབས། དེ་ལྟར་རིམ་བཞིན་དད་འདུས་ཀྱི་སློབ་མ་ལྔ་བཅུ་ཕམ་བྱུང་བ་རྣམས་ཁྲིད་དེ་སྔ་རྗེས་སུ་ཀོང་ཡུལ་སྟེང་རྩ་དང་། བྷ་ཁ། སྨན་མོ་སྒང་སོགས་ལ་ཕེབས་ཤིང་། ས་ཆ་དེ་ཚོའི་མང་ཚོགས་ལ་ལྕགས་ཟམ་འཛུགས་པའི་དགོས་པ་དགེ་མཚན་དྲིལ་བསྒྲགས་ཏེ་ལྕགས་ཀྱི་སློང་མོ་མཛད་པ་དང་དུས་མཚུངས་རང་ཉིད་འཁོར་བཅས་ལྕགས་ཁ་སྔོག་འདོན་གྱི་ལས་ལ་བཞུགས། ལྷག་པར་ཀོང་བོ་སྨན་མོ་སྒང་དུ་ཚོགས་ཁང་ཀ་བ་བཅུ་གཉིས་ཟླ་བ་གཅིག་ལ་གྲུབ་ནས་ལྕགས་ཀྱི་གཏེར་ཁ་སྟོབས་ཆེ་བ་བཏོན། ཀོང་བོ་བ་རྣམས་ཀྱིས་ཕུལ་བ་ལ་དམིགས་རྟེན་མཛད། མགར་བ་མང་བོ་བསགས་ནས་ལྕགས་བརྡུངས་དགོས་དགོངས་པའི་ཚེ་ཀོང་བོ་བ་དོན་གྲུབ་རྒྱལ་བོས་ལྕགས་ཁུར་པོ་བཅུ་གསུམ་ཕུལ་བ་སོགས་ལྕགས་ཧ་ཅང་མང་བོ་བྱུང་བར་ཀུན་དགའ་སོགས་ལྕགས་ཧ་ཅང་མང་བོ་བྱུང་བར་ཀུན་དགའ་སོགས་མགར་བ་མང་བོ་དང་ལྷན་ཅིག་ཏུ་བཟོ་མཛད། ཞག་བཅོ་བརྒྱད་ཀྱི་རིང་ལ་ལྕགས་ཐག་འདོམ་བཅོ་བརྒྱད་ཡོད་པ་བཞི་གྲུབ་པས་མཚོན་ལྕགས་གུག་རྐང་བུ་སྟོང་ཕྲག་མང་བོ་བཟོ་རྡུང་མཛད། དེ་དག་སྐྱེལ་འདྲེན་གྱི་མཛོ་གཡག་ཀྱང་ཀོང་བོ་བ་རྣམས་ལ་སྐུལ་མ་གནང་སྟེ་ཐོག་མ་ཁོ་ནར་མཛོ་ཉིས་བརྒྱ་བཞི་བཅུ་ལ་ལྕགས་བཀལ་ནས་དབུས་གཙང་ཕྱོགས་སུ་བརྫང་། ཐང་སྟོང་རྒྱལ་བོ་རང་ཡང་གཙང་སྟོད་དུ་ཕྱིར་ཕེབས་ནས་འབུལ་བ་བྱུང་ཚད་ལྕགས་ལ་བསྒྲིལ་ཏེ་ལྕགས་གུག་རྐང་བུ་བརྡུངས་ནས་རྐང་བུ་བཅོ་ལྔ་ལ་དོས་ཚང་བྱས་པའི་ལྕགས་ཕུར་སྟོང་ཕྲག་གཅིག་དང་སུམ་བརྒྱ་བྱུང་བ་པ་གྲོ་བ་རྣམས་ཀྱིས་མ་བསྐུལ་དང་བླངས་ཀྱི་སྒོ་ནས་ཕག་རི་བར་བསྐྱལ། ལྕགས་ཕུར་སྟོང་ཕྲག་གཅིག་དང་བརྒྱ་ལ་སྟོད་བྱང་ལ་དྲངས། གཞན་ཡང་དབུས་གཙང་ཁམས་གསུམ་དང་མོན་ཡུལ་སོགས་ལ་ཕེབས་ནས་ལྕགས་མང་བོ་བསྒྲུབས། དེ་རྗེས་སླར་ཡང་ཀོང་ཡུལ་ལ་ཕེབས་པར་ཆབ་དཀར་ནག་སོགས་ཀོང་བོའི་ཡུལ་གྲུ་ཁག་ལ་ལྕགས་ཀྱི་གཏེར་ཁ་མི་གཅིག་པ་མང་བོ་བརྡོལ་བ་སྟབས་འགྲིགས་པས་ལྕགས་ཀྱི་འབུལ་བ་མཐའ་ཡས་པ་བྱུང་བ་དང་དུས་མཚུངས་སྔ་ས་ནས་ཀོང་བོ་རྩ་གོང་དུ་ཆེད་དུ་མངགས་ནས་བཞག་པའི་སློབ་མ་རྣམས་ཀྱིས་ཀྱང་ཐང་སྟོང་རྒྱལ་བོ་ཀོང་ཡུལ་ཙ་ཀོང་དཔལ་གྱི་གནས་གསར་དུ་ཕེབས་པའི་སྐུ་གདོང་དུ་ལྕགས་གུག་རྐང་བུ་དོས་མགོ་སུམ་བརྒྱ་དུས་གཅིག་ཏུ་སྤུངས། དེ་ནས་ཐང་སྟོང་རྒྱལ་བོ་ལ་སྟོད་ཕྱོགས་སུ་ཕྱིར་ལོག་ཕེབས་རྗེས་དཔོན་སློབ་མ་ཆོས་སྒྲོན་ཀོང་ཙ་གོང་ལ་མངགས་པ་ལྟར་དེ་གར་ལྕགས་གུག་རྐང་བུའི་ཕུང་པོ་རི་ཆུང་ཙམ་ཡོད་པ་རྣམས་ཀོང་བོ་བ་ཚོར་རྔན་པ་ཆེན་པོ་གནང་ནས་བརྫངས་པས་ཉ་མགོ་གྲུ་ཁར་ཕེབས། དེ་ལྟར་ཐང་སྟོང་རྒྱལ་བོས་ཡུལ་གྲུ་མང་བོར་སློང་མོ་མཛད་པའི་ལྕགས་དང་རང་ཉིད་འཁོར་བཅས་ཀྱིས་ལྕགས་ཁ་སྔོག་འདོན་གནང་ནས་བྱུང་བའི་ལྕགས་རྣམས་ལས་ལྕགས་གུག་རྐང་བུ་ཁྲི་ཕྲག་དུ་མ་བཟོ་སྐྲུན་མཛད་དེ་ལྕགས་ཟམ་འཛུགས་ཡུལ་གྱི་ས་ཆ་ཁག་ལ་དྲངས་སོ། །ལྕགས་ཟམ་འཛུགས་ས་ལྷ་གདོང་ཤན་ཁར་ཕེབས་སྐབས་སྐུ་ངལ་ཆེན་པོ་ཕྲད་པས་ཐོག་མར་སྐྱིད་ཆུའི་གྲུ་ཁ་འདི་ཉིད་དུ་ལྕགས་ཟམ་འཛུགས་རྒྱུའི་དམ་བཅའ་བཀོད་ཡོད་པ་ལྟར་དགུང་གྲངས་བདུན་ཅུ་ཞེས་པ་རབ་བྱུང་བདུན་པའི་ལྕགས་ཕོ་ཁྱི༼༡༤༣༠༽ལོར་ལྷ་སར་ཕེབས་ནས་སྡེ་པ་སྐྱིད་ཤོད་པ་དང་ཁུལ་དེའི་སེར་སྐྱ་ཀུན་ལ་གཙང་བོའི་ལྷོ་བྱང་གཉིས་སུ་རྡོ་གསོག་པའི་སྐུལ་མ་གནང་བར་ལྕགས་ཟམ་འཛུགས་མི་ཐུབ་ཟེར་བ་སོགས་མ་འདོད་པའི་གཏམ་སྣ་ཚོགས་བྱུང་ཡང་། མི་སེར་རྣམས་ཀྱིས་རྡོ་བ་མང་དུ་བསགས་ནས་ཆུའི་བྱང་དུ་ཟམ་རྟེན་བརྩིགས་ཤིང་། ལྷོ་ཕྱོགས་སུ་བྲག་ལ་ལྕགས་ཕུར་བཏབ་ནས་ལྕགས་ཐག་གི་སྣེ་གཉིས་བཀལ། ལྕགས་ཟམ་ལ་འདོགས་བྱེད་ཐག་པ་འབུལ་མཁན་མ་བྱུང་བར་སྡེ་བ་སྐྱིད་ཤོད་པ་ལ་ཐང་སྟོང་རྒྱལ་བོས་ཁོ་བོས་ཤར་ཀོང་བོའི་ཡུལ་ནས་ལྕགས་འདི་ཙམ་འཁྱེར་ཡོད་ཀྱང་ཁྱེད་ཀྱིས་ཐག་པ་ཙམ་ཞིག་ཀྱང་མི་སྟེར་བ་བསམ་པ་ཆུད་ཅེས་གསུངས་པ་དང་། མཐར་སྐྱིད་ཤོད་ཕུ་མདའི་མི་སེར་རྣམས་ཀྱིས་ཐག་པ་མི་ཁུར་བརྒྱ་ཕུལ་བ་ལྕགས་ལ་བཏགས་པ་བཅས་ལོ་དེ་རང་ལ་ལྕགས་ཟམ་ལེགས་པར་གྲུབ། དུས་དེ་ནས་བཟུང་གྲུབ་ཐོབ་ལྕགས་ཟམ་པ་ཞེས་སྙན་པའི་གྲགས་པ་ཕྱོགས་ཀུན་ཏུ་ཁྱབ་པར་གྱུར་ཏོ། །གཞན་ཡང་ཡར་ལུང་ཉ་མགོ་གྲུ་ཁའི་ལྕགས་ཟམ་འཛུགས་པའི་ཚུལ་ནི་མདུང་ཤིན་ཏུ་རིང་བ་ལ་འཕྱར་དར་གྱིས་མཛེས་པ་གཙང་བོའི་དབུས་སུ་བཙུགས། ལྷོ་བྱང་གཉིས་ཀ་ལ་རྡོ་ཤིན་ཏུ་དཀོན་ཡང་བྱེ་མའི་གསེབ་ནས་རྡོ་བཏོན་ཏེ་ཤན་དང་ཀོ་བ་རྣམས་སུ་བཅུག དར་ཆེན་གྱི་དྲུང་དུ་སླེབས་པ་དང་རྡོ་རྣམས་ཆུ་ཀླུང་ཆེན་པོ་ལ་བསྐྱུར། ཟམ་འབུམ་ལེགས་པར་གྲུབ། ལྕགས་རྣམས་སྦྲེལ་ནས་དབུས་གཙང་ཐམས་ཅད་ཀྱི་ཆུ་དྲིལ་བའི་རྒྱ་མཚོ་མེར་བ་ལྟ་བུའི་བྱང་གི་ཕྱོགས་ལ་ཟམ་མིག་སུམ་ཅུ་རྩ་གཉིས་དང་བཅས་པ་རབ་བྱུང་བརྒྱད་པའི་ཤིང་མོ་སྦྲུལ༼༡༤༨༥༽ལོའི་ཧོར་ཟླ་བདུན་པའི་ཚེས་བཅོ་ལྔའི་ཡན་ལ་ལེགས་པར་གྲུབ་པ་བཅས་འདི་ནི་ཐང་སྟོང་རྒྱལ་བོས་འཛུགས་པར་མཛད་པའི་མཐའ་མཇུག་གི་ལྕགས་ཟམ་དེ་ཡིན། ཐང་སྟོང་རྒྱལ་བོས་འཛུགས་སྐྲུན་གནང་བའི་ལྕགས་ཟམ་རྣམས་ཁག་གསུམ་ལ་དབྱེ་ཆོག་པ་སྟེ་ཐད་ཀར་ཇུས་འདོན་སྣེ་ཁྲིད་ཀྱིས་བསྐྲུན་པ་ལྷ་ས་སྐྱིད་ཆུའི་ལྕགས་ཟམ་ལྟ་བུ་དང་། ཇུས་འགོད་དང་། གཞི་འདིང་བ། ལྕགས་ཐག་འཐེན་པ་སོགས་འགག་རྩའི་གནས་སྐབས་སུ་རང་ཉིད་ངོ་མ་ཞུགས་ཤིང་། བར་གྱི་བྱ་བ་བུ་སློབ་རྣམས་སྒྲུབ་ཏུ་བཅུག་པ་ཆུ་བོ་རིའི་ལྕགས་ཟམ་ལྟ་བུ། བུ་སློབ་རྣམས་མངགས་རྫོང་གནང་ནས་བསྐྲུན་པ་ཡར་ལུང་ཉ་མགོ་གྲུ་ཁུའི་ལྕགས་ཟམ་ལྟ་བུའོ། །གང་དེས་དབུས་གཙང་ཁམས་གསུམ་ལ་བསྡོམས་ལྕགས་ཟམ་ལྔ་བཅུ་ང་བརྒྱད། ཤན་ཆེན་དང་གྲུ་འདྲེས་པ་བརྒྱ་དང་བཅོ་བརྒྱད། ཤིང་ཟམ་དྲུག་ཅུ་ཐམ་པ། སྐུའི་རྟེན་རྒྱབ་མཐོ་སུམ་ཅུ་སོ་བདུན་ཆེ་ཚད་དང་། ཆུང་ཚད་མཁྱིད་གང་ལས་བྱས་པའི་རིན་པོ་ཆེ་གསེར་དངུལ་བྱུ་རུ་མུ་མེན་སྤོས་ཤེལ་དུང་རྣམས་ལས་གྲུབ་པ་བརྒྱ་ཕྲག་དུ་མ། འཇིམ་པ་ལས་གྲུབ་པ་རྒྱབ་མཐོ་ལྔ་བཅུ་ང་ལྔ་ནས་མཐོ་གསུམ་མའི་བར་སྟོང་ཕྲག་ལྔ། གྱང་རིས་རས་བྲིས་བསམ་གྱིས་མི་ཁྱབ་པའི་འདུ་ཁང་དང་གཙུག་ལག་ཁང་བརྒྱ་དང་ཉི་ཤུ། གསུང་གི་རྟེན་གསེར་ལས་གྲུབ་པའི་བཀའ་འགྱུར་ཞིག་གི་མགོ་བྱས་བཀའ་འགྱུར་བཅོ་བརྒྱད། བསྟན་འགྱུར་བཅོ་ལྔ། ཐུགས་ཀྱི་རྟེན་དཔལ་རི་བོ་ཆེའི་མཆོད་རྟེན་ཆེན་པོའི་ཕྱོགས་རེ་ལ་ཕོ་འདོམ་བཞི་བཅུ་ཡོད་པ་ཆེ་ཚད་དང་ཕྱོགས་རེ་ལ་འདོམ་བརྒྱད་ཡོད་པས་ཆུང་ཚད་བྱས་པའི་མཆོད་རྟེན་བརྒྱ་དང་བཅུ་གཅིག དབེན་གནས་ཐར་པ་གླིང་ལ་སོགས་པ་སྒྲུབ་སྡེ་མང་བོ་དང་སེམས་ཅན་གྱི་སྲོག་སྐྱོབ་པ། སྦས་ཡུལ་དང་མཐའ་འཁོབ་རྣམས་སུ་གནས་སྒོ་འབྱེད་པ་སོགས་དང་། ཐོག་མར་ལྕགས་ཟམ་གྱི་མཐུན་རྐྱེན་སྒྲུབ་བྱེད་དུ་བོད་ཀྱི་ལྷ་མོའི་ཟློས་གར་གསར་གཏོད་གནང་བ་དང་། ཐང་སྟོང་རྒྱལ་བོས་འཛུགས་སྐྲུན་གནང་བའི་ལྕགས་ཟམ་དེ་རྣམས་བཟོ་དབྱིབས་ཀྱི་ཐད་ནས་བཤད་ན་དཔྱང་ཟམ་ཡིན་པ་དང་། དེ་ཡང་རིང་ཚད་དང་ཞེང་ཚད་སྣ་ཚོགས་པ་ཞིག་ཡོད་པ་ལས་རིང་བའི་ཚད་ལ་སྤྱི་ཁྲེ་བརྒྱ་ལྷག་ཙམ་དང་ཐུང་བའི་གྲས་ལ་སྤྱི་ཁྲེ་ལྔ་བཅུ་ཙམ་དུ་ཡོད། ཞེང་ཚད་ལ་ལར་སྤྱི་ཁྲེ་གཉིས་ཙམ་དང་། མང་ཆེ་བར་སྤྱི་ཁྲེ་གང་དང་སྤྱི་སྐར་ལྔ་བཅུའི་ཚད་དུ་ཡོད་པར་སྣང་། ཟམ་པ་རྒྱག་ཡུལ་གྱི་ས་བབ་དང་། གཙང་བོའི་ཞེང་ཚད། གཏིང་ཚད་སོགས་ལ་གཞིགས་ཏེ་མི་འདྲ་བའི་ཁྱད་པར་ཡོད་པ་ནི། གཙང་བོ་ཁ་ཞེང་ཆེ་ཡང་གཏིང་ཚད་ཧ་ཅང་ཟབ་མོ་མེད་ལ་འབབ་རྒྱུན་གཟར་ཚད་ཀྱང་ཆེན་པོ་མེད་པའི་རིགས་ལ་ཆུ་ཀླུང་གི་དབུས་སུ་ཟམ་འབུམ་བརྩིགས་ཡོད་པ་དང་། གཏིང་ཚད་ཟབ་ལ་ཆུ་འགྲིལ་ཆེ་ཞིང་། འབབ་རྒྱུན་གཟར་བོའི་རིགས་ལ་ལྕགས་ཐག་ཡུག་གཅིག་གིས་སྦྲེལ་བ་དེ་ལ་ཡང་ལྕགས་སྣེ་གཉིས་ཀ་ཟམ་རྔུར་ལ་བརྟེན་པའམ། གཞོགས་གཅིག་བྲག་རིར་རིང་ཚད་སྤྱི་ཁྲེ་གཉིས་ཙམ་དང་སྦོམ་ཚད་སྤྱི་སྐར་དྲུག་ཙམ་ཡོད་པའི་ལྕགས་ཕུར་བཏབ་ནས་ལྗིད་ཚད་རྟེན་བྱེད་རྡོ་རྩིག་གི་སྟེགས་བུ་སྲ་བརྟན་བརྒྱབ་ཡོད། ལྟོ་བར་བུ་ག་ཕུག་པའི་རྡོ་སྒོར་མོ་བར་མཚམས་ངེས་ཅན་དང་བཅས་སྟར་དུ་བསྒྲིགས་པར་ལྕགས་ཐག་བརྒྱུས་ཏེ་མཚམས་མཚམས་ལ་རྒྱབ་བཀག་ལྕགས་ཕུར་བཏབ་ནས་རྡོ་ཆེན་སྒོར་མོ་དེ་རྣམས་ཟམ་རྔུར་དང་ཟམ་འབུམ་གྱི་དཀྱིལ་དུ་བཙུད་དེ་གཡས་གཡོན་རྡོ་རྩིག་གིས་བསྡོམས་ནས་ལྗིད་ཚད་བརྟེན་ཐུབ་པ་བཟོས་ཡོད། ཟམ་འབུམ་དང་ཟམ་རྔུར་གྱི་མདུན་ངོས་ལྕགས་ཐག་འགེལ་སར་གདུང་མ་འཕྲེད་དུ་བཀལ་ཡོད་པ་དེ་ལ་མི་སེར་ཚོས་གཉའ་ཤིང་ཞེས་འབོད་སྲོལ་འདུག ལྕགས་ཐག་འཁྱོམ་པའི་སྐབས་བརྡར་ཤུགས་ཆེ་བས་རྡོ་ལ་མ་རེག་པར་གདུང་མ་དེ་དག་གིས་ལྕགས་ཐག་ལ་ཟོན་སྐྱོར་གྱི་ཕན་ཆ་ཡོད་འདུག་ཅིང་། གདུང་མ་བརྡར་ཟད་དུ་གྱུར་པའི་ཚེ་གསར་དུ་བརྗེ་ཆོག སོ་མའི་ཐག་པས་ལྕགས་ཐག་ཕན་ཚུན་སྦྲེལ་བའི་དྲ་མིག་གི་སྟེང་དུ་རྡོག་ཤིང་ཞེས་པ་པང་ལེབ་གཏིང་ནས་ཅི་བདེར་བགྲོད་ཆོག་པ་ཡོད། གཞན་ཡང་ལྕགས་ཐག་གཉིས་གཤིབ་དང་བཞི་སྦྲགས་སྣ་ཚོགས་ཡོད་པ་མ་ཟད། ལྕགས་ཐག་ཕྲ་སྦོམ་འདྲ་མིན་ཡོད་པ་ལས་འགྲུབ་བཞུད་ཆེ་ཞིང་ཟམ་ཐག་རིང་བའི་གྲས་ལ་བྱིས་པ་ལོ་བརྒྱད་ལོན་པའི་ལག་ངར་ཙམ་དང་། ཐུང་བའི་རིགས་ལ་དེ་ལས་ཅུང་ཟད་ཕྲ་བ་ཡོད། ལྕགས་གུག་རྐང་བུའི་འགྲིག་ཁ་མིག་བཙུམས་པ་ལྟར་མཐུད་ཀ་གང་ཡིན་མངོན་མི་ཐུབ་པ་མ་ཟད། ལྕགས་རྣམས་ཞུན་ཧ་ཅང་དག་པོ་ཡོད་པའི་ཐོག་ལུ་གུ་རྒྱུད་དུ་སྦྲེལ་བའི་ལྕགས་གུག་རྐང་བུ་སྟོང་ཕྲག་མང་བོ་ཀོང་གཅིག་ཏུ་བླུགས་པ་ལྟ་བུའི་བཟོ་བཀོད་གཅིག་མཚུངས་འཇམ་ཤ་དོད་པ་བཅས་འདུག ལོ་ངོ་བརྒྱ་ཕྲག་མང་བོའི་རིང་ལ་ཆར་རྒྱུན་དྲག་པོའི་འོག་ཏུ་གནས་ཀྱང་བཙའ་མི་རྒྱག་པ་དང་ལྕགས་ཀྱི་རང་མདོག་མ་ཉམས་པར་ཡོད་པ་སོགས་ཁྱད་ཆོས་མང་བོ་མིག་ལམ་དུ་འདྲེན་རྒྱུ་ཡོད། ལོ་རབས་ལྔ་བཅུ་བའི་དུས་སྐབས་ཙམ་ལའང་བོད་ལྗོངས་ཀྱི་འགྲིམ་འགྲུལ་ཐོག་ལ་ཕན་ནུས་ཡོད་པ་མ་ཟད། འགྲིམ་འགྲུལ་མི་བདེ་བའི་ལུང་ཁུག་འགའ་ཞིག་ཏུ་ད་ལྟ་ཡང་ལྕགས་ཟམ་དེ་ཚོའི་ཐོག་འགྲུལ་བཞུད་བྱེད་མུས་སུ་ཡོད། སྔར་སོང་རང་བྱུང་འགྱུར་བའི་ལོ་རབས་ནང་ཉམས་གསོ་དང་། བདག་གཅེས་མེད་པས་ཉམས་ཞིག་ཏུ་གྱུར་པ་དང་། བོད་འདིར་སྔར་སོང་མི་ལོ་ཉིས་སྟོང་ཙམ་གྱི་སྔོན་ནས་ཆུ་ཆེན་པོར་ཟམ་པ་འཛུགས་པའི་རིག་པ་དང་ལག་རྩལ་ཡོད་པ་ཙམ་དུ་མ་ཟད། ཐང་སྟོང་རྒྱལ་བོ་ནི་དར་མ་དཔལ་བ་སོགས་ལས་མེ་རླུང་དང་ཆུའི་དཀའ་ཐུབ་ཀྱི་གདམས་ངག་ཐོབ་རྗེས་སྦྱོང་བ་མཐར་ཕྱིན་མཛད་མྱོང་བ་ཞིག་ཡིན་པས་མེ་རླུང་གི་སྒོམ་དང་ཆུའི་དཀའ་ཐུབ་ལྷུར་བླངས་ཏེ་ཕུང་ཁམས་ཀྱི་རང་འཕེལ་བདེ་བགྲོད་ཀྱི་ནུས་པ་སོགས་ལ་བརྟེན་ནས་གྲང་ངར་བཟོད་ཐུབ་པ་དང་ཆུས་མི་ཚུགས་པ་སོགས་དམིགས་བསལ་གྱི་ཁྱད་ནུས་ཐོན་རྒྱུ་ཡོད་པ་ནི་ཕུང་ཁམས་ཀྱི་འགྱུར་བའི་རྒྱུ་མཚན་ཡིན། ཐང་སྟོང་རྒྱལ་བོ་ནི་བོད་རིགས་མི་དམངས་ཀྱིས་རྒྱུས་མངའ་ཆེ་ཤོས་དང་མོས་གུས་ཆེན་པོ་ཞུ་བའི་ལོ་རྒྱུས་ཐོག་གི་མི་སྣ་ཞིག་ཡིན་ཅིང་། དེའི་རྒྱུ་མཚན་གཙོ་བོ་ནི་ཁོང་གི་སྐུ་ཚེ་གཅིག་རིང་མི་དམངས་ལ་ཕན་ཐོགས་ཡོད་པའི་བྱ་བ་བཟང་བོ་ཇི་སྙེད་མཛད་པ་དང་། ལྷག་པར་ལྕགས་ཟམ་འཛུགས་སྐྲུན་དང་ལྷ་མོ་གསར་བཏོད་གནང་བ་སོགས་ཡིན། གང་དེའི་བཀའ་དྲིན་ལ་རྗེས་དྲན་ཞུ་ཆེད་སྔ་དུས་ཁྱིམ་ཚང་སོ་སོར་ཐང་སྟོང་རྒྱལ་བོའི་སྐུ་བརྙན་རེ་བསྟན་པའམ་ཡང་ན་གནས་ཁང་གསར་བར་སྤོ་སྐབས་ཐོག་མར་ཐང་སྟོང་རྒྱལ་བོའི་སྣང་བརྙན་གདན་འདྲེན་པ་སོགས་བྱེད་སྲོལ་ཡོད། ༼དུང་དཀར་ཚིག་མཛོད་ཆེན་མོ་ལས་བཏུས།༽